Дуулал

ДУУЛАЛ 77

Бурханы агуу үйлсийг санагалзах нь
Удирдаачдад: Иедутуны дагуу.

Асафын дуулал.

77 ¹ Дуу хоолой минь Бурханд,
Дуу хоолой минь Бурханд

 хашхирав.
Тэр намайг дуулаасай.
² Зовлон шаналангийнхаа өдөр
Би Эзэнийг хайна.
Шөнөөр ч гараа сунган эс цуцна.
Сэтгэл минь ч тайвшрахаас

 татгалзана.
³ Бурханыг санаад би шанална.
Би тунгаан бодож
Сүнс минь сульдаж байна.                                             Села
⁴ Та нүдний минь зовхийг тогтоон

 барина.
Ихэд шаналсан би
Ярьж ч эс чадна.
⁵ Эртний өдрүүдээ,

 урьдын жилүүдээ бодно.
⁶ Шөнөөр дуугаа би санана.
Би зүрхэндээ бясалгах бөгөөд
Сүнс минь эрэлхийлнэ.
⁷ Эзэн үүрд хаяна гэж үү?
Тэр дахин хэзээ ч

 таалан авахгүй юм уу?
⁸ Энэрэл хайр нь

 мөнхөд барагдсан уу?
Амлалт нь мөнхөд үгүй болсон уу?
⁹ Бурхан нигүүлсэнгүй байхаа

 мартсан гэж үү?
Тэрээр уурандаа

 өршөөлөө зогсоосон юм уу?

                                                                                               Села
¹⁰ Тэгээд би “Хамгийн Дээд Нэгэний
Баруун мутар өөрчлөгдсөн нь
Миний уй гашуу билээ” гэв.
¹¹ ЭЗЭНий үйлсийг би санана,
Эрт үеийн гайхамшгуудыг тань

 үнэхээр санана.
¹² Таны бүх ажлыг би тунгаана,
Таны үйлдлүүдийг шимтэн бодно.
¹³ Бурхан, Таны зам ариун
Бидний Бурханы адил,
Бурхан шиг хэн аугаа вэ?
¹⁴ Гайхамшгуудыг үйлддэг

  Бурхан Та
Ард түмнүүдийн дунд
Хүч чадалаа мэдүүлжээ.
¹⁵ Та ард түмнээ, Иаков ба Иосефын

 хөвгүүдийг

мутраараа зольжээ.                                                                                                     Села
¹⁶ Их ус Таныг харав, Бурхан минь ээ,
Их ус Таныг хараад бэмбэгэнэв.
Оёоргүй гүн нь ч чичрэв.
¹⁷ Үүлс усыг цутгав.
Тэнгэрс ч дуу чимээг гаргав.
Таны сумнууд ч хаа сайгүй

 харвагджээ.
¹⁸ Аянгын тань дуу

 хуй салхин дунд байв.
Цахилгаан гялбаанууд дэлхийг гэрэлтүүлжээ.
Газар чичрэн хөдөлж байлаа.
¹⁹ Таны зам далай дундуур,
Жимүүд тань их усанд байв.
Гэлээ ч Таны мөрүүд эс

 мэдэгджээ.
²⁰ Ард түмнээ хонин сүрэг мэт
Мосе ба Аароны гараар
Та удирдсан билээ.