Дуулал

ДУУЛАЛ 103

Бурханы сайн сайханд талархахуй
Давидаас.

103 ¹ Сэтгэл минь ээ,

 ЭЗЭНийг магтагтун
Дотор минь байгаа бүгд
Түүний ариун нэрийг магтагтун.
² Сэтгэл минь ээ, ЭЗЭНийг магтаж,
Ач тусыг нь ч бүү март.
³ Тэрээр бүх хилэнцийг чинь

 уучилж,
Бүх өвчнийг чинь илааршуулдаг.
⁴ Тэрээр амийг чинь мөхлөөс

 зольж,
Чамд хайр энэрэл ба өршөөлийн

 титмийг зүүлгэдэг.
⁵ Залуу нас чинь бүргэд мэт

 шинэчлэгдэхийн тулд
Тэрээр амьдралыг чинь сайнаар

 хангадаг.
⁶ ЭЗЭН дарлагдсан бүхний төлөө
Зөвт үйлс болон шүүлтүүдийг

 үйлддэг.
⁷ Өөрийн замыг Мосед,
Үйлсээ Израилийн хөвгүүдэд
Тэрээр мэдүүлсэн.
⁸ ЭЗЭН өрөвч, нигүүлсэнгүй,
Уурлахдаа удаан,
Хайр энэрлээр элбэг баян.
⁹ Үргэлжид тэмцэлдэхгүй,
Уураа ч Тэрээр мөнхөд

 хадгалахгүй.
¹⁰ Хилэнцэд минь тааруулан
Хандаагүй билээ, Тэрээр бидэнд
Гэм буруугаар маань ч
Хариулаагүй билээ, бидэнд.
¹¹ Учир нь тэнгэр нь
газрын дээгүүр

 өндөрт байдаг шиг
Түүнээс эмээгчдэд

 энэрэл хайр нь агуу их.
¹² Өрнө нь дорноос хол байдаг адил
Гэмт үйлдлийг маань биднээс
Тэрээр тийн холдуулсан.
¹³ Эцэг хүн хөвгүүдээ

 өрөвддөгийн адил
ЭЗЭН Өөрөөс нь эмээгчдийг

 өрөвддөг.
¹⁴ Учир нь хэлбэр дүрсийг маань

 Тэрээр мэддэг.
Биднийг тоос шороо гэдгийг

 санаж байдаг.
¹⁵ Хүний хувьд, өдрүүд нь өвс ногоо

 адил.
Хээрийн цэцэг шиг

 тэрээр дэлгэрнэ.
¹⁶ Салхи үлээгээд өнгөрөхөд
тэр үгүй болох бөгөөд
Тэр газар ч түүнийг эс танина.
¹⁷ Харин ЭЗЭНий хайр энэрэл
Түүнээс эмээгчдийн дээр
Мөнхөөс мөнхөд болоод
Түүний зөвт байдал
Хөвгүүдийн хөвгүүдэд байна.
¹⁸ Энэ нь Түүний гэрээг сахигчдад,

 Түүний заавруудыг
биелүүлэхээр санагчдад юм.
¹⁹ ЭЗЭН сэнтийгээ тэнгэрт залсан

 бөгөөд
Түүний хаанчлал бүхнийг

 захирдаг.
²⁰ Үгийнх нь дуу хоолойг даган
Үгийг нь биелүүлдэг, хүч чадалтай,
Түүний тэнгэрэлч нар аа,
ЭЗЭНийг магтагтун.
²¹ Түүний хүслийг биелүүлэн
Түүнд үйлчилдэг,
Түүний түг түмд та нар
ЭЗЭНийг магтагтун.
²² Түүний захиргаа бүх газарт буй
Түүний бүх бүтээл ээ,
ЭЗЭНийг магтагтун.
Сэтгэл минь ээ,
ЭЗЭНийг магтагтун.