Дуулал

ДУУЛАЛ 104

Бүтээгч, тэтгэгч Бурхан

104 ¹ Сэтгэл минь ээ,
ЭЗЭНийг магтагтун.
Миний Бурхан ЭЗЭН,
Та аугаа бөгөөд
Цог жавхлан, сүр хүчээр

 хувцаслажээ.
² Хувцас адил Та Өөртөө гэрлийг

 өмсөж,
Тэнгэрийг хөшиг мэт татдаг.
³ Тасалгааныхаа тулгуурыг
уснаас дээгүүр тавьж,
Үүлсийг тэргээ болгон хөлөглөөд,
Салхин жигүүрээр Та явдаг.
⁴ Салхинуудыг элчээ,
Галын дөлийг Та үйлчлэгчээ

 болгодог.
⁵ Үүрд мөнхөд дайвуулуулахгүйн

 тулд
Дэлхийг суурин дээр нь

 Та тогтоон тавьсан.
⁶ Хувцсаар халхлахын адил
Та түүнийг

 оёоргүй гүнээр бүрхсэн.
Их ус уулсын дээгүүр байжээ.
⁷ Зэмлэлээр тань тэд зугтаж,
Аянгын дуунаар тань

 тэд зайлан оддог.
⁸ Уул өөд өгсөж,
Таны тэдэнд оноосон газар болох
Хөндий талууд уруу

 тэд бууж байна.
⁹ Газрыг бүрхэхээр тэднийг
Дахин буцаж ирүүлэхгүйн тулд
Та их усны хязгаарыг тогтоожээ.
¹⁰ Хөндий уруу Тэрээр
Булгуудыг илгээдэг бөгөөд
Тэдгээр нь уулсын дундуур

 урсжээ.
¹¹ Хээрийн араатан амьтан бүрийг

 ундаалж,
Хулангуудын цангааг ч тайлдаг.
¹² Мөчрүүдийн дунд

 дуулан жиргэдэг
Огторгуйн шувууд

 дэргэд нь нутагшдаг.
¹³ Дээд тасалгаанаасаа
Тэрээр уулсыг усалдаг бөгөөд
Үйлсийнх нь үр жимсэнд
Газар дэлхий ханадаг.
¹⁴ Тэрээр мал сүрэгт зориулан

 өвсийг,
Хүний хэрэгцээнд зориулан

 ургамал ногоог ургуулдаг нь
Газар шорооноос хүнсийг
гаргуулахын тулд агаад
¹⁵ Хүний зүрхийг баясгах дарсыг,
Нүүрийг өнгөлөх тосыг
Мөн хүний зүрхийг

 тэнхрүүлэх хоолыг

гаргуулахын тулд билээ.
¹⁶ Арвин ихээр ундаалагддаг
ЭЗЭНий модод нь
Түүний тарьсан,

 Ливаны хуш модод билээ.
¹⁷ Тэнд шувууд үүрээ засдаг агаад
Жодоо моддыг өрөвтас

 оромжоо болгодог.
¹⁸ Өндөр уулс янгирт,
Хад цохио доргонд

 хоргодох газар болой.
¹⁹ Цаг хугацааг заахаар
Тэрээр сарыг бүтээсэн.
Нар ч шингэх газраа мэднэ.
²⁰ Та харанхуйг томилсонд
Тэр нь шөнө болж,
Тэгэхэд ойн бүх араатан амьтад

 хэсэн явдаг.
²¹ Залуу арслангууд

 идэшнийхээ хойноос архирч,
Бурханаас хүнсээ гуйдаг.
²² Нар мандахад тэд эргээд цугларч,
Үүрэндээ хэвтдэг.
²³ Хүн ажиллахаар,
Үдэш болтол хөдөлмөрлөхөөр

 гардаг.
²⁴ Аяа ЭЗЭН,
Таны үйлс хичнээн их вэ!
Мэргэн ухаанаар Та
Тэр бүхнийг бүтээжээ.
Дэлхий баялгаар тань дүүрэн юм.
²⁵ Агуу, өргөн далай энэ байна.
Тоо томшгүй олон

  мөлхөгчид буюу
Том, жижиг амьтад тэнд бий.
²⁶ Тэнд усан онгоцнууд зөрж явдаг.
Тоглож байхаар Таны бүтээсэн
Левиатан ч бий.
²⁷ Тогтоосон цагт  хүнсийг нь өгөхийг тань
Тэд бүгд хүлээдэг.
²⁸ Та тэдэнд өгвөл тэд түүж авдаг.
Мутраа дэлгэхэд тань
Тэд сайн сайханд ханадаг.
²⁹ Таныг нүүрээ нуухад

 тэд хямардаг

 Амьсгалыг нь авахад тэд үхэж,
Хөрс шороондоо буцдаг.
³⁰ Таныг Сүнсээ илгээхэд тэд

 бүтээгддэг.
Та газрын төрхийг ч шинэчилдэг.
³¹ ЭЗЭНий алдар мөнхөд байх

 болтугай.
ЭЗЭН үйлс дотроо

 баярлах болтугай.
³² Түүнийг дэлхий уруу харахад

 тэр нь чичирдэг.
Уулсад хүрэхэд нь тэд

 утаа уугиулдаг.
³³ Би амьддаа ЭЗЭНд дуулна.
Би байх зуураа Бурханаа магтана.
³⁴ Миний бясалгалууд Түүнд
тааламжтай байх болтугай.
Би ЭЗЭНий дотор баярлах болно.
³⁵ Нүгэлтнүүд газар дэлхийгээс

 ангижирч,
Гэм буруутнууд үгүй болог.
Сэтгэл минь ээ,

 ЭЗЭНийг магтагтун.
ЭЗЭНийг магтагтун.