ДУУЛАЛ 54
Дэмжлэг эрсэн залбирал
Удирдаачид. Чавхдаст хөгжимд.
Зифчүүд Саулд “Давид бидний дунд
нуугджээ” гэх үеийн Давидын маскил.
54 1 Бурхан, Өөрийн нэрээр
намайг аварч,
Хүч чадлаараа намайг
нотолж өгөөч.
2 Бурхан, залбирлыг минь сонсооч.
Амны минь үгст чих тавиач.
3 Учир нь харь хүмүүс
миний эсрэг боссон бөгөөд
Хэрцгий хүмүүс амийг минь эрж байна.
Тэд Бурханыг урдаа залдаггүй
хүмүүс юм. Села
4 Харагтун, Бурхан миний туслагч
Эзэн бол амийг минь тэтгэгч
5 Тэрээр буцаана, дайснуудад минь
ёрын мууг буцаана.
Үнэн дотроо тэднийг устгаач.
6 Би сайн дурын тахилыг
Танд нядлан тахина.
ЭЗЭН, Таны нэр сайн учир
би магтана.
7 Тэр намайг зовлон шаналан
бүгдээс аварсан бөгөөд
Би дайснуудаа нүдээрээ харсан.