ДУУЛАЛ 14
Итгэл сүсэггүйдлийг буруушаахуй
Удирдаачид. Давидаас.
14 1 Мунхаг нэгэн зүрхэндээ
“Бурхан байдаггүй” гэдэг.
Тэд завхарцгааж, жигшүүрт зүйлс
хийдэг агаад
Сайныг үйлддэг хүн алга.
2 Тэнгэрээс ЭЗЭН
хүний хөвгүүдийг
өнгийн харсан нь
Ухаардаг, Бурханыг эрэн хайдаг хүн
байгаа эсэхийг
харахын тулд аж.
3 Тэд төөрөлдөн явж,
бүгд адилхан завхарцгаасан.
Сайныг үйлддэг хүн алга,
ганц ч алга.
4 Талх иддэг шиг
хүмүүсийг минь иддэг агаад
ЭЗЭНийг дууддаггүй, ёс бусыг
үйлдэгч бүхэнд
мэдлэг байна уу?
5 Бурхан зөв шударга үеийнхэнтэй
хамт байгаа учир
Тэд тэнд үлэмж ихээр
айж чичрэх болно.
6 Та нар ядуусын бодол санааг
ичгүүртэй болгосон.
Гэвч ЭЗЭН хоргодох газар нь юм.
7 Израилийн аврал
Сионоос гарах болтугай!
ЭЗЭН олзлогдсон хүмүүсээ
эргүүлэн авч ирэхэд
Иаков баясан, Израиль баярлана.