ДУУЛАЛ 149
Израилийг ивээгч ЭЗЭНийг магтагтун!
149 1 ЭЗЭНийг магтагтун!
ЭЗЭНд шинэ дууг,
Бишрэлтнүүдийн цуглаанд
Түүний магтаалыг дуулагтун!
2 Израиль, Бүтээгчдээ баярлагтун!
Сионы хөвгүүд
Хаандаа баярлагтун!
3 Бүжиглүүлэн нэрийг нь магтуул.
Хэнгэрэг болон ятга хөгжмөөр,
тэднээр
Түүнийг магтуул.
4 Учир нь ЭЗЭН
ард түмнээрээ бахаддаг.
Дордсыг Тэрээр авралаар
үзэсгэлэнтэй болгодог.
5 Бишрэлтнүүдийг
алдар дотор баясуул.
Орон дотор нь ч тэднийг
баясгалантайгаар дуулуул.
6 Хоолойд нь Бурханы дээд
магтаалуудыг,
Хос ирт илдийг гарт нь байлга.
7 Энэ нь үндэстнүүд дээр
өшөө авалтыг,
Ард түмнүүд дээр
ялыг гүйцэлдүүлэхийн тулд,
8 Хаадыг нь гинжээр,
Ноёдыг нь төмөр дөнгөөр
хүлэхийн тулд,
9 Бичигдсэн шүүлтийг тэдэнд
гүйцэтгэхийн тулд болой.
Бишрэлт бүгдэд нь
хүндэтгэл энэ билээ.
ЭЗЭНийг магтагтун!