97 ¹ЭЗЭН захирдаг, газар дэлхий баясагтун.
Олон арлууд ч баярлагтун.
²Үүлс ба түнэр харанхуй Түүнийг хүрээлдэг.
Зөв шударга ба шударга ёс бол Түүний сэнтийн суурь юм.
³Түүний өмнө гал гарч,
Эргэн тойронд Түүний өстнүүдийг шатаадаг.
⁴Түүний аянга цахилгаан ертөнцийг гэрэлтүүлдэг.
Газар дэлхий хараад, чичрэв.
⁵Бүх дэлхийн Эзэний өмнө буюу
ЭЗЭНий өмнө уулс лааны тос шиг хайлсан.

⁶Тэнгэрүүд Түүний зөв шударгыг тунхагладаг бөгөөд
Бүх хүмүүс Түүний цог жавхланг харсан.

⁷Сийлмэл хөргүүдэд үйлчилдэг,
Шүтээнүүдээр бардамнадаг бүх хүмүүс ичих болтугай.
Бүх бурхад аа, Түүнд мөргөгтүн.
⁸Өө, ЭЗЭН, Таны шүүлтүүдээс болж
Сион сонсоод баярлаж,
Иудагийн охид баяссан.
⁹Учир нь Та бол бүх дэлхийн дээр Хамгийн Дээд ЭЗЭН юм.
Та бүх бурхдаас хавьгүй дээгүүр өргөмжлөгдсөн.

¹⁰Өөрийн бурханлаг хүмүүсийн сэтгэлийг хамгаалдаг
ЭЗЭНийг хайрлагч та нар, бузар мууг үзэн яд.
Тэр тэднийг хорон муу хүний гараас авардаг.
¹¹Зөв шударга хүний төлөө гэрэл,
Шулуун шударга зүрхтэй хүний төлөө баяр хөөр таригдсан.
¹²Зөв шударга та нар, ЭЗЭНд баярлаж,
Түүний ариун нэрд талархагтун.