92 ¹Өө, Хамгийн Дээд Нэгэн, ЭЗЭНд талархлыг өргөн
Таны нэрд магтан дуулах нь сайн юм.
²Өглөө Таны хайр энэрлийг,
Шөнөөр Таны итгэлтэй байдлыг
³Арван утаст ятга болон босоо ятгаар,
Ятгын ая дуугаар тунхаглах нь ч сайн.
⁴Учир нь ЭЗЭН Та хийсэн зүйлсээрээ намайг баярлуулсан бөгөөд
Би Таны гарын үйлсийн улмаас баясгалантайгаар дуулна.

⁵Өө, ЭЗЭН, Таны үйлс хичнээн агуу вэ!
Таны бодлууд гүн гүнзгий юм.
⁶Мунхаг хүн ч мэдэхгүй,
Тэнэг хүн ч үүнийг ухаарахгүй.
⁷Энэ нь хорон муу хүн өвс шиг соёолж,
Гэм бурууг үйлдэгчид бүгд цэцэглэхэд
Тэд мөнхөд устгагдахын тулд ч байсан ажгуу.
⁸Харин ЭЗЭН Та бол мөнхөд эрхэм дээд юм.
⁹Учир нь үзтүгэй ЭЗЭН, Таны дайснууд,
Учир нь үзтүгэй, Таны дайснууд сөнөнө.
Гэм бурууг үйлдэгчид бүгд тараагдах болно.

¹⁰Харин Та миний эврийг зэрлэг үхрийнх мэт өргөмжилсөн.
Би шинэхэн тосоор тослогдсон.
¹¹Миний нүд дайснууд уруу минь харж,
Миний чих миний эсрэг босогч хорон муу хүмүүсийн тухай сонсдог.
¹²Зөв шударга хүн далдуу мод шиг цэцэглэж,
Ливан дахь хуш мод шиг ургана.
¹³ЭЗЭНий өргөөнд суулгагдсан
Тэд бидний Бурханы хашаануудад цэцэглэнэ.
¹⁴Тэд хөгширсөн ч жимс гаргана.
Тэд шүүслэг ба ногоон байна.
¹⁵Энэ нь ЭЗЭН шулуун шударга гэдгийг тунхаглахын тулд юм.
Тэр бол миний хад бөгөөд Түүн дотор шударга бус юм гэж үгүй.