7 ¹Миний Бурхан ЭЗЭН, Таны дотор би хоргодсон билээ.
Намайг мөшгөж буй бүгдээс намайг авран, чөлөөлөөч.
²Эс тэгвэл чөлөөлөх хүнгүйд намайг чирэн, тэрээр арслан мэт намайг урж тастчина.

³Миний Бурхан ЭЗЭН, хэрэв би үүнийг хийсэн бол,
Хэрэв миний гарт гэм нүгэл байгаа бол,

⁴Хэрэв би анд нөхөртөө хорон мууг буцааж,
Шалтгаангүйгээр миний өстөн болсон хүнээс булааж авсан бол
⁵Дайсан минь намайг мөшгөн бариг.
Тэрээр амийг минь газарт гишгэлэн,
Алдрыг минь тоос шороонд унагааг.
⁶ЭЗЭН, ууран дотроо босооч.
Миний өстнүүдийн хилэнгийн эсрэг зогсооч,
Миний төлөө босооч. Та шийтгэлийг товлосон билээ.
⁷Тоо томшгүй хүмүүсээр Та Өөрийгөө хүрээлүүлж,
Тэдний дээгүүр өндөртөө буцаж залраач.
⁸ЭЗЭН ард түмнүүдийг шүүдэг.
Миний дотор буй миний зөв шударга болон үнэнч байдлын дагуу,
ЭЗЭН, намайг зөвтгөөч.
⁹Хорон муу хүний бузар мууг төгсгөж,
Харин зөв шударга хүнийг бат тогтоогооч.
Зөв шударга Бурхан зүрх болон оюун бодлыг шалгадаг юм.
¹⁰Миний бамбай
Цэх шулуун зүрхтнийг авардаг Бурханд бий.
¹¹Бурхан бол шударга шүүгч бөгөөд
Өдөр бүр хилэгнэдэг Бурхан юм.

¹²Хэрвээ хүн гэмшихгүй бол
Тэрээр илдээ ирлэх болно.
Тэрээр нумаа хөвчлөөд, бэлэн болгожээ.
¹³Тэрээр бас Өөртөө алах зэвсгүүдийг бэлтгэсэн юм.
Тэрээр сумаа галт сум болгодог.
¹⁴Харагтун, тэрээр гэм нүглийг төрүүлэхээр дуншиж,
Хорон муугаар жирэмсэлж, худал хуурмагийг төрүүлдэг.
¹⁵Тэрээр нүх малтан, түүнийгээ ухаад,
Өөрийн ухсан нүхэндээ унасан юм.
¹⁶Түүний хорон муу өөрийнх нь толгой дээр эргэн ирж,
Түүний хүчирхийлэл өөрийнх нь зулай дээр бууна.

¹⁷Би ЭЗЭНд Түүний зөв шударгын дагуу талархаж,
Хамгийн Дээд ЭЗЭНий нэрд магтаалыг дуулна.