17 ¹Шударгын хэргийг сонсооч, ЭЗЭН,
Миний хашхирахыг анхаараач.
Худал хуурмаггүй уруулаас гарсан залбиралд минь чих тавиач.
²Миний шүүлт Таны өмнөөс ирэх авай.
Таны мэлмий цэх шулуунаар харах болтугай.
³Та миний зүрхийг шалгав.
Та шөнө айлчилжээ.
Та намайг сорьсон бөгөөд Та юуг ч олоогүй.
Би амаараа гэм нүгэл хийхгүй гэж шийдсэн.
⁴Хүний үйлсийн тухайд
Таны уруулын үгийн дагуу
Би хүчирхийлэгчийн замаас сахин хамгаалсан.
⁵Миний алхмууд Таны замуудад бат холбогдсон.
Хөл минь халтирсангүй.

⁶Бурхан,
Та надад хариулах учир Би Таныг дуудсан юм.
Надад чихээ тавин, үгийг минь сонсооч.
⁷Таны баруун мутрын хажууд
Эсэргүүцэн босогчдоос хоргодогчдын Аврагч аа,
Хайр энэрлээ гайхамшигтайгаар үзүүлээч.
⁸Намайг нүдний цэцгий мэт хамгаалаач.
Далавчнуудынхаа сүүдэрт намайг халхлаач,
⁹Намайг дарагч хорон муу хүнээс,
Намайг бүсэлсэн хөнөөлт дайснуудаас.
¹⁰Тэд өөхөөрөө хучигдаж,
Тэд амаараа бардамнан ярьдаг.
¹¹Тэд одоо алхам бүрд маань биднийг хүрээлжээ.
Тэд газарт унагах гэж харцаа тогтоодог.
¹²Тэрээр олзоо тастчин хаяхыг хүсдэг арслан мэт,
Нууц газруудад гэтдэг залуу арслан мэт юм.

¹³Босооч, ЭЗЭН,
Түүнтэй тулж, түүнийг доош унагаач.
Өөрийн илдээр миний сэтгэлийг хорон муу хүнээс авраач.
¹⁴ЭЗЭН, энэ амьдралд өөрийн хувийг хүртсэн ертөнцийн хүмүүсээс,
Тэр хүмүүсээс Өөрийн мутраар авраач.
Тэдний хэвлийг Та эрдэнэсээрээ дүүргэдэг билээ.
Тэд үр хүүхдүүддээ сэтгэл хангалуун байж,
Өв хөрөнгөө өөрсдийн баялгуудыг нялх хүүхдүүддээ үлдээдэг юм.
¹⁵Миний хувьд бол би зөв шударгаар Таны нүүрийг харна.
Би сэрэхдээ Таны дүр төрхөнд сэтгэл хангалуун байна.