64 ¹Бурхан, Миний гомдлын дууг сонсооч.
Дайсны аймшгаас амийг минь хамгаалаач.
²Намайг бузар муу хүмүүсийн нууц хуйвалдаан,
Гэм буруу үйлдэгчдийн үймээн шуугианаас нуугаач.
³Тэд хэлээ илд мэт ирлэжээ.
Тэд хорон үгсээ сум мэт онилсон нь
⁴Нууц далд газраас гэм зэмгүй хүнийг харвахын тулд юм.
Тэд түүн уруу гэнэтхэн харвадаг бөгөөд айдаг ч үгүй.
⁵Тэд хорон зорилго дотор бат зогсдог.
Тэд нууцаар урхи тавих тухай ярилцдаг.
Тэд “Хэн тэднийг харах юм бэ?” гэдэг.
⁶Тэд “Бид гүйцэд боловсруулсан хуйвалдааныг дуусгалаа” гэж хэлэн
Шударга бусыг сэддэг.
Учир нь хүний дотор бодол болон зүрх сэтгэлийг ойлгож болохгүй билээ.

⁷Харин Бурхан тэднийг сумаар харвана.
Тэд гэнэтхэн шархадна.
⁸Ингээд тэд түүнийг бүдрүүлнэ.
Тэдний өөрсдийнх нь хэл өөрсдийнх нь эсрэг байдаг.
Тэднийг харагчид бүгд толгой сэгсэрнэ.
⁹Тэгээд бүх хүмүүс айж,
Бурханы ажлыг тунхаглан,
Түүний үйлдсэнийг тунгаан бодох болно.
¹⁰Зөв шударга хүн ЭЗЭНий дотор баярлаж, Түүний дотор хоргодно.
Шударга зүрхтэй хүн бүхэн бахархан бахдана.