Миний дайснуудыг надаас болж баярлуулаагүй учраас
Би Таныг өргөмжилнө.
²Миний Бурхан ЭЗЭН,
Би тусламж гуйн Тан уруу хашхирсан бөгөөд
Та намайг эдгээсэн.
³ЭЗЭН, Та миний сэтгэлийг Үхэгсдийн орноос татан гаргасан.
Би нүх уруу доошоо явахгүйн тулд Та намайг амьд үлдээсэн.
⁴Түүний бурханлаг хүмүүс ээ,
Та нар ЭЗЭНд магтаалыг дуулж,
Түүний ариун нэрд талархал өргөгтүн.
⁵Учир нь Түүний уур хилэн агшин зуурынх,
Мөн Түүний ивээл насан туршийнх.
Шөнөжин уйлаан байж болно,
Харин өглөөд баярын хашхираан ирдэг.

⁶Миний хувьд гэвэл, би таатай нөхцөлдөө
“Би хэзээ ч ганхахгүй” гэсэн.
⁷ЭЗЭН, Өөрийн ивээлээр Та миний уулыг бат тогтоосон.
Та Өөрийн нүүр царайг нуусанд би сэтгэл зовж байв.
⁸ЭЗЭН, Тан уруу би хашхирч,
ЭЗЭНд би гуйлтыг өргөсөн.
⁹“Би доошоо нүх уруу очвол миний цус ямар ашигтай вэ?
Тоос шороо Таныг магтах уу?
Тэр нь Таны итгэлтэй байдлыг тунхаглах уу?

¹⁰ЭЗЭН, сонсоод намайг нигүүлсээч.
ЭЗЭН, миний туслагч болооч”.
¹¹Та надад уй гашууг минь бүжиг болгосон.
Та тааран хувцсыг минь тайлан надад баяр хөөрийг өмсгөсөн.
¹²Ингэсэн нь би дуугүй байхгүй бөгөөд
Сэтгэлээрээ Танд магтаалыг дуулахын тулд болой.
Миний Бурхан ЭЗЭН, би Танд мөнхөд талархана.