80 ¹Иосефыг хонин сүрэг мэт удирддаг
Израилийн хоньчин оо, чих тавин сонсооч.
Херубуудын дээгүүр залрагч аа, гэрэлтээч.
²Ефраим, Бениамин болон Манассегийн өмнө Өөрийн хүчийг харуулан,
Биднийг аврахаар ирээч!
³Бурхан, биднийг сэргээж
Өөрийн нүүр царайг гэрэлтүүлээч,
Тэгвэл бид аврагдах болно.

⁴Түмэн цэргийн Бурхан ЭЗЭН,
Та хэдий болтол Өөрийн хүмүүсийн залбиралд уурлах вэ?
⁵Та тэднийг нулимсаар хооллож,
Тэдэнд нулимсыг ихээр уулгасан.
⁶Та биднийг хөршийн маань маргааны бай болгодог бөгөөд
Дайснууд маань өөрсдийнхөн дундаа шоолон хөхөрдөг.
⁷Түмэн цэргийн Бурхан, биднийг сэрээж,
Өөрийн нүүр царайг гэрэлтүүлээч,
Тэгвэл бид аврагдах болно.

⁸Та усан үзмийн нэгэн модыг Египетээс гаргасан.
Та үндэстнүүдийг хөөн гаргаж, түүнийг суулгасан.
⁹Та түүнд хөрсийг бэлтгэсэн бөгөөд
Тэр нь газарт гүнзгий үндэслэж, нутгийг дүүргэсэн.
¹⁰Түүний сүүдэр уулсыг бүрхсэн бөгөөд
Түүний мөчрүүд Бурханы хуш шиг байв.
¹¹Тэр мөчрөө далай хүртэл,
Салаагаа Мөрөн хүртэл сунгасан.
¹²Замаар явж өнгөрөгч бүхэн жимсийг нь түүхээр
Юунд Та түүний ханыг нураасан бэ?
¹³Ойн бодон гахай түүнийг идэж,
Тал хээрт хөдөлдөг бүхэн түүгээр хооллодог.

¹⁴Түмэн цэргийн Бурхан, дахин эргэн ирээч, бид Танаас гуйж байна.
Тэнгэрээс өнгийн харж, энэ усан үзмийн модыг болон
¹⁵Таны баруун мутрын тарьсан нахиаг ч арчлан,
Өөрийнхөө төлөө бат бэх болгосон мөчрөө ч хараач.
¹⁶Тэр нь галд шатаж, тастуулсан.
Таны нүүр зэмлэснээс болж тэд сөнөдөг.
¹⁷Таны гар Таны баруун гар тал дахь хүний дээр,
Таны Өөрийнхөө төлөө бат бэх болгосон хүний хүүгийн дээр байх болтугай.
¹⁸Тэгвээс бид Танаас ухарч буцахгүй.
Биднийг сэргээгээч, тэгвэл бид Таны нэрийг дуудна.
¹⁹Түмэн цэргийн Бурхан ЭЗЭН, биднийг сэргээгээч.
Өөрийн нүүр царайг гэрэлтүүлээч,
Тэгвэл бид аврагдах болно.