44 ¹Бурхан, эртний өдрүүд болох
Бидний эцэг өвгөдийн өдрүүдэд Таны үйлдсэн ажлыг
Тэд бидэнд ярьсан бөгөөд
Бид чихээрээ сонссон билээ.
²Та Өөрийнхөө гараар улс үндэстнүүдийг зайлуулсан.
Тэгээд Та эцэг өвгөдийг маань суурьшуулсан.
Та хүмүүст гай тарьж,
Тэднийг тараасан.
³Учир нь өөрсдийн илдээр тэд газар нутгийг эзлээгүй,
Мөн өөрсдийнх нь гар тэднийг авраагүй,
Харин Таны баруун гар болон Таны мутар, Таны оршихуйн гэрэл тэгсэн
Учир нь Та тэднийг ивээсэн.

⁴Бурхан, Та бол миний Хаан.
Иаковд ялалтыг тушаагаач.
⁵Танаар бид өөрсдийн өстнүүдийг эргүүлэн шахна.
Таны нэрээр бидний эсрэг босогчдыг бид гишгэчнэ.
⁶Би өөрийн нуманд найдахгүй,
Миний илд ч намайг аврахгүй.
⁷Харин Та биднийг өстнүүдээс минь аварч,
Биднийг үзэн ядагчдыг Та ичгүүрт унагасан.
⁸Бид өдөржин Бурханаар бахархсан бөгөөд
Бид Таны нэрд мөнхөд талархана.
⁹Гэсэн ч Та орхиж, биднийг ичгүүр болгон,
Бидний цэргүүдтэй хамт давшдаггүй.
¹⁰Та биднийг өстний өмнөөс зугтаалгасан.
Биднийг үзэн ядагчид өөрсдөдөө олз авсан.
¹¹Та биднийг идэшний хонь шиг өгч,
Биднийг улс үндэстнүүдийн дунд тараасан.
¹²Та Өөрийн хүмүүсийг үнэгүй шахам худалддаг бөгөөд
Тэднийг худалдсанаар ямар ч ашиг аваагүй.
¹³Та биднийг хөршүүдэд маань ичгүүр,
Эргэн тойрныхонд маань элэглэл, тохуурхал болгодог.
¹⁴Та биднийг улс үндэстнүүдийн дунд зүйрлэл,
Хүмүүсийн дунд шившиг болгосон.
¹⁵Миний шившиг өдөржин миний өмнө байдаг бөгөөд
Миний доромжлол намайг дүүргэжээ.
¹⁶Энэ нь намайг буруушааж, зэмлэдэг нэгний дуунаас,
Дайсан хийгээд өшөө авагчийн оршихуйгаас болой.

¹⁷Энэ бүхэн бидэнд тохиолдсон боловч бид Таныг мартаагүй бөгөөд
Бид Таны гэрээнд хуурамчаар хандаагүй.
¹⁸Бидний зүрх эргэж буцаагүй бөгөөд
Бидний алхмууд Таны замаас хазайгаагүй.
¹⁹Гэтэл Та биднийг цөөвөр чононуудын орогнох газарт няц дарж,
Биднийг үхлийн сүүдрээр хучсан билээ.

²⁰Хэрэв бид өөрсдийн Бурханы нэрийг мартсан,
Эсвэл гараа харийн бурхан уруу сунгасан бол
²¹Бурхан үүнийг олж илрүүлэхгүй байсан гэж үү?
Учир нь Тэрээр зүрхний нууцыг мэддэг юм.
²²Харин Таны төлөө бид бүхэл өдөржин алуулдаг.
Бид нядлуулах хонь шиг тооцогдсон байна.
²³Эзэн, босооч. Юунд Та унтана вэ?
Сэрээч, биднийг бүү мөнхөд орхиоч.
²⁴Юунд Та нүүрээ нууж, бидний зовлон, дарамтыг мартана вэ?
²⁵Учир нь сэтгэл маань тоос шороонд дарагдав.
Бидний бие газарт наалддаг.
²⁶Босооч, бидэнд тусалж,
Өөрийн хайр энэрлийн төлөө биднийг авраач.