116 ¹Би ЭЗЭНд хайртай. Учир нь Тэр
Миний дуу хоолойг, гуйлтыг минь сонсдог.
²Тэр намайг чих тавин сонсдог учраас
Би амьд байх хугацаандаа дуудах болно.
³Үхлийн уяа намайг ороож,
Үхэгсдийн орны аймшгууд над дээр иржээ.
Би зовлон зүдгүүр хийгээд уй гашуутай ч учирсан.
⁴Тэгээд би ЭЗЭНий нэр дээр дуудан
“Өө, ЭЗЭН, би Танаас гуйя, амийг минь авраач!” гэв.

⁵ЭЗЭН бол нигүүлсэнгүй ба зөв шударга.
Тийм ээ, бидний Бурхан бол өрөвч.
⁶ЭЗЭН гэнэн цайлган хүнийг хамгаалдаг.
Намайг дорд болоход Тэр намайг аварсан.
⁷Сэтгэл минь ээ, эргээд амар тайван бол доо.
Учир нь ЭЗЭН чамд их өгөөмөр хандсан юм.
⁸Учир нь Та миний сэтгэлийг үхлээс,
Нүдийг минь нулимснаас,
Хөлийг минь бүдрэхээс аварсан билээ.
⁹Би ЭЗЭНий өмнө
Амьдын нутагт алхах болно.
¹⁰“Би ихэд зовж шаналсан” гэж хэлэхдээ
Би итгэсэн юм.
¹¹Би бачимдахдаа
“Бүх хүмүүс худалч” гэж хэлсэн.

¹²Надад өгсөн бүх ашиг тусынх нь төлөө
Би ЭЗЭНд юугаар хариулах вэ?
¹³Би авралын хундагыг өргөж,
ЭЗЭНий нэр дээр дуудна.
¹⁴Би бүх ард түмнийх нь өмнө
ЭЗЭНд тангарагласнаа биелүүлнэ.
¹⁵Өөрийнх нь бурханлаг хүмүүсийн үхэл
ЭЗЭНий мэлмийд үнэ цэнэтэйд тооцогддог.
¹⁶Өө, ЭЗЭН, би үнэхээр Таны зарц,
Би Таны зарц бүсгүйн хүү Таны зарц билээ.
Та миний хүлээсийг тайлсан юм.
¹⁷Танд би талархлын тахилыг өргөж,
ЭЗЭНий нэр дээр дуудна.
¹⁸Би бүх ард түмнийх нь өмнө
ЭЗЭНд тангарагласнаа биелүүлнэ.
¹⁹Иерусалим аа, чиний гол дунд,
ЭЗЭНий өргөөний хашаанд би тангарагласнаа биелүүлнэ.
ЭЗЭНийг магтагтун!