86 ¹Өө, ЭЗЭН чих тавин надад хариулаач.
Учир нь би зовж, гачигдаж байна.
²Би бурханлаг хүн учир сэтгэлийг минь хамгаалаач.
Өө, миний Бурхан Та Өөрт тань итгэдэг Өөрийн зарцыг авраач.
³Өө, Эзэн, намайг нигүүлсээч,
Учир нь Тан уруу хандан Би өдөржин хашхирдаг.
⁴Өөрийн зарцын сэтгэлийг баярлуулаач,
Учир нь Эзэн Тан уруу би сэтгэлээ өргөдөг.
⁵Учир нь Эзэн Та сайн бөгөөд уучлахад бэлэн,
Таныг дуудагч бүгдэд хайр энэрлээр элбэг баян.
⁶Өө, ЭЗЭН, миний залбирлыг чих тавин чагнаач.
Миний гуйлтуудын дуунд анхаарал тавиач!
⁷Өөрийн зовлонгийн өдөр би Таныг дуудна,
Учир нь Та надад хариулна.
⁸Өө, ЭЗЭН, бурхдын дунд Тан шиг хэн ч үгүй,
Таных шиг үйлс ч байхгүй.
⁹Өө, ЭЗЭН, Таны бүтээсэн бүх улс үндэстэн ирж,
Таны өмнө хүндэтгэн мөргөж,
Таны нэрийг алдаршуулна.
¹⁰Учир нь Та бол аугаа бөгөөд гайхамшигт үйлсийг үйлддэг.
Та ганцаараа л Бурхан юм.

¹¹Өө, ЭЗЭН, Өөрийн замыг надад зааж өгөөч.
Би Таны үнэнээр явах болно.
Таны нэрээс эмээхээр зүрхийг нэгтгээч.
¹²Миний Бурхан ЭЗЭН, би бүх зүрхээрээ Танд талархаж,
Таны нэрийг мөнхөд алдаршуулна.
¹³Учир нь надад хандсан Таны хайр энэрэл аугаа бөгөөд
Та миний сүнсийг Үхэгсдийн орны гүнээс аварсан.

¹⁴Өө, Бурхан, бардамнагч хүмүүс миний эсрэг босож,
Хүчирхийлэгч хүмүүсийн бүлэглэл миний амийг хайсан бөгөөд
Тэд Таныг өөрсдийнхөө өмнө залаагүй.
¹⁵Харин ЭЗЭН Та бол өршөөлт, нигүүлсэлт,
Уурлахдаа удаан, хайр энэрэл болон үнэнээр элбэг баян Бурхан юм.
¹⁶Над уруу эргэж, намайг нигүүлсээч.
Өөрийн зарцад Өөрийн хүчийг өгч,
Шивэгчнийхээ хүүг авраач.
¹⁷Намайг үзэн ядагчид хараад ичихийн тулд
Сайны төлөөх тэмдгийг надад үзүүлээч.
Учир нь ЭЗЭН Та надад туслан, намайг тайвшруулсан.