12 ¹Туслаач ЭЗЭН, учир нь бурханлаг хүн тасарч,
Итгэлтэй нэгэн хүний хөвгүүдийн дундаас үгүй болох нь.
²Тэд бие биедээ худлыг хэлдэг.
Тэд зусардагч уруулаараа хоёр зүрх гарган ярьдаг.
³Бүх зусардагч уруул болон
Сайрхан яригч хэлийг ЭЗЭН таслах болтугай.

⁴Тэд “Өөрсдийн хэлээр бид ялна.
Уруул маань биднийх юм.
Хэн биднийг захирах юм бэ?” гэжээ.
⁵ЭЗЭН “Сул доройн дарлагдал,
Гачигдагсдын ёолох дуунаас болж Би босож,
Түүнийг хүссэн аюулгүй газарт нь тавина” гэдэг.

⁶Шавар зууханд тунгаагдаж,
Долоо дахин цэвэршүүлэгдсэн мөнгө мэт
ЭЗЭНий үг бол цэвэр юм.
⁷ЭЗЭН, Та тэднийг хамгаална.
Та эдүгээ үеийнхнээс мөнхөд хүртэл тэднийг хадгална.
⁸Олиггүй этгээдүүд хүний хөвгүүдийн дунд өргөмжлөгдөхөд
Хорон муу хүмүүс эргэн тойронд явдаг.