76 ¹Бурхан Иудад алдартай.
Түүний нэр Израильд аугаа.
²Түүний асар Салемд бий.
Түүний орших газар ч бас Сионд бий.
³Тэнд Тэрээр галтай сумнууд,
Бамбай, сэлэм болон дайны зэвсгүүдийг хугалсан.
⁴Та бол алдартай,
Олзны уулсаас ч илүү сүр жавхлантай.
⁵Бат бэх зүрхтэй хүмүүс дээрэмдүүлж,
Нойрсоцгоожээ.
Дайчдын хэн нь ч гараа хөдөлгөж чадаагүй.
⁶Иаковын Бурхан, Таны зэмлэлд
Морьтон хийгээд морь нь хоёулаа гүн нойронд автжээ.
⁷Та, зөвхөн Та бол эмээн хүндэтгүүштэй юм.
Таныг нэгэнт уурласан үед хэн Таны өмнө зогсох вэ?

⁸Та тэнгэрээс шүүлтийг сонсгосон.
⁹Бурхан дэлхийн бүх даруу хүмүүсийг аврахаар
Шүүхийн тулд боссон үед
Газар айж, дуугүй байсан. ¹⁰Учир нь хүний уур хилэн Таныг магтах болно.
Уур хилэнгийн үлдэгсдээр Та Өөрийгөө хүрээлүүлнэ.

¹¹Өөрийн Бурхан ЭЗЭНд тангараглаж, түүнийгээ биелүүл.
Түүнийг хүрээлэгч бүгд эмээвэл зохих Түүнд бэлгүүдийг баригтун.
¹²Тэрээр ноёдын сүнсийг номхтгоно.
Түүнээс дэлхийн хаад айдаг юм.