34 ¹Би ЭЗЭНийг цаг үргэлж магтана.
Түүнийг магтах нь миний аманд үргэлж байх болно.
²Миний сэтгэл ЭЗЭНээр сайрхана.
Даруу хүн үүнийг сонсон баярлана.
³Надтай хамт ЭЗЭНийг дээдэлж,
Хамтдаа Түүний нэрийг өргөмжилцгөөе.

⁴Би ЭЗЭНийг хайсан бөгөөд Тэр надад хариулж,
Бүх айдсаас минь намайг аварсан.
⁵Тэд Түүнийг хараад гэрэлтэх болсон бөгөөд
Тэдний нүүр царай дахин ичгүүрт орохгүй.
⁶Энэ ядуу хүн хашхирахад ЭЗЭН түүнийг сонсож,
Бүх саад бэрхшээлээс нь түүнийг аварсан.
⁷ЭЗЭНий тэнгэр элч Түүнээс эмээгчдийн эргэн тойронд байж,
Тэднийг авардаг.

⁸ЭЗЭН сайн гэдгийг амсаж үз.
Түүний дотор хоргоддог хүн юутай ерөөлтэй вэ!
⁹Түүний ариун хүмүүс ээ, та нар ЭЗЭНээс эмээгтүн.
Түүнээс эмээгчдэд юу ч дутагддаггүй.
¹⁰Залуу арслан ч гачигдан өлсөж байдаг.
Харин ЭЗЭНийг хайгчид ямар ч сайн юмаар гачигдахгүй.
¹¹Хүүхдүүд ээ, та нар ирж, намайг сонс.
Би та нарт ЭЗЭНээс эмээхийг зааж өгье.
¹²Амийг хүсэмжилдэг бөгөөд
Сайныг харахаар урт наслахыг хайрлагч хэн бэ?
¹³Өөрийн хэлийг хорон муугаас,
Өөрийн уруулыг худал хэлэхээс сахин хамгаал.
¹⁴Бузар муугаас салж, сайныг үйлд.
Амар тайвныг хайж, түүнийг мөрдөн мөшгө.

¹⁵ЭЗЭНий мэлмий зөв шударга хүн уруу чиглэсэн байдаг бөгөөд
Түүний сонор тэдний хашхирахыг чагнадаг.
¹⁶ЭЗЭНий нүүр царай бузрыг үйлдэгчдийн эсрэг байдаг нь
Тэдний тухай дурсгалыг ч дэлхийгээс арилгахын тулд юм.
¹⁷Тэднийг хашхирахад ЭЗЭН сонсож,
Бүх саад бэрхшээлээс нь тэднийг авардаг.
¹⁸ЭЗЭН эмтэрсэн зүрхтэй хүнд ойртон байдаг бөгөөд
Сүнсээрээ гэмшигчдийг авардаг.

¹⁹Зөв шударга хүний зовлон зүдгүүр их байдаг,
Харин ЭЗЭН түүнийг тэр бүгдээс нь авардаг.
²⁰Тэр түүний бүх ясыг хамгаалдаг,
Тэднээс нэг нь ч хугараагүй юм.
²¹Бузар муу байдал хорон муу хүнийг ална.
Зөв шударга хүнийг үзэн ядагчид буруушаагдана.
²²ЭЗЭН Өөрийн зарц нарын сэтгэлийг авардаг бөгөөд
Түүний дотор хоргоддог хэн нь ч буруушаагдахгүй.