114 ¹Израиль Египетээс,
Иаковын гэр харь хэлтэй хүмүүсийн дундаас гарахад
²Иуда Түүний ариун газар,
Израиль ч Түүний эзэмшил болсон билээ.

³Тэнгис хараад зугтжээ.
Иордан ч ухран буцав.
⁴Уулс хуц мэт харайж,
Толгод хурга мэт цовхчив.
⁵Тэнгис ээ, юуны учир чи зугтав аа?
Иордан аа, чи юунд ухрав аа?
⁶Уулс аа, та нар юунд хуц мэт харайв?
Толгод оо, юунд хурга мэт цовхчив?

⁷Өө, газар дэлхий Эзэний өмнө,
Иаковын Бурханы өмнө доргигтун.
⁸Тэрээр хадыг усан цөөрөм,
Хатуу чулууг ч усны булаг болгосон.