103 ¹Сэтгэл минь ээ, ЭЗЭНийг магтагтун.
Дотор минь байгаа бүхэн ч Түүний ариун нэрийг магтагтун.
²Сэтгэл минь ээ, ЭЗЭНийг магтаж,
Түүний ач тусын алийг нь ч бүү март.
³Тэр чиний бүх гэм бурууг уучилж,
Чиний бүх өвчнийг илааршуулдаг.
⁴Тэр чиний амийг мөхлөөс аварч,
Чамд хайр энэрэл болон өршөөлийн титмийг өмсгөдөг.
⁵Залуу нас чинь бүргэд мэт шинэчлэгдэхийн тулд
Тэр чиний хүслийг сайн зүйлсээр хангадаг.

⁶ЭЗЭН дарлагдсан бүхний төлөө
Зөв шударга үйлсийг болон шүүлтүүдийг үйлддэг.
⁷Тэр Өөрийн замыг Мосед,
Өөрийн үйлсийг Израилийн хөвгүүдэд мэдүүлсэн.
⁸ЭЗЭН бол өрөвч, нигүүлсэнгүй,
Уурлахдаа удаан болоод хайр энэрлээр элбэг баян.
⁹Тэр үргэлж тэмцэлдэхгүй,
Уураа ч мөнхөд хадгалахгүй.
¹⁰Тэр бидний үйлдсэн нүглийн дагуу бидэнд хандаагүй,
Бидний гэм буруугийн дагуу бидэнд хариу өгөөгүй.
¹¹Учир нь тэнгэр газрын дээгүүр өндөрт байдаг шиг
Түүнээс эмээгчдэд Түүний хайр энэрэл агуу их юм.
¹²Өрнө дорноос хол байдаг шиг
Тэр бидний алдаа зөрчлийг биднээс тийн холдуулсан.
¹³Эцэг хүн үр хүүхдээ өрөвддөгийн адил
ЭЗЭН Өөрөөс нь эмээгчдийг өрөвддөг.
¹⁴Учир нь Тэр Өөрөө бидний хэрхэн бүтсэнийг мэддэг.
Бид бол тоос шороо юм гэдгийг Тэр санаж байдаг.

¹⁵Хүний хувьд гэвэл, түүний өдрүүд өвс ногоо шиг байдаг.
Тэрээр хээрийн цэцэг шиг өсөн хөгждөг.
¹⁶Дээгүүр нь салхи өнгөрөхөд тэр үгүй болдог бөгөөд
Түүний газар нь ч түүнийг дахин таньдаггүй.
¹⁷Харин ЭЗЭНий хайр энэрэл Түүнээс эмээгчдийн дээр мөнхөөс мөнхөд болоод
Түүний зөв шударга байдал үр хүүхдүүдийн үр хүүхдүүдэд хүрдэг.
¹⁸Энэ нь Түүний гэрээг сахигчдад,
Түүний заавруудыг биелүүлэхээр санагчдад юм.

¹⁹ЭЗЭН Өөрийн сэнтийг тэнгэрт залсан бөгөөд
Түүний хаанчлал бүхнийг захирдаг.
²⁰Түүний үгийн дууг даган
Түүний үгийг биелүүлдэг, хүч чадалтай,
Түүний тэнгэр элч нар аа, ЭЗЭНийг магтагтун.
²¹Түүний хүслийг биелүүлэн Түүнд үйлчилдэг
Түүний түмэн цэргүүд ээ, та нар ЭЗЭНийг магтагтун.
²²Түүний захирдаг бүх газарт буй
Түүний бүтээлүүд болох та бүгд ээ, ЭЗЭНийг магтагтун.
Сэтгэл минь ээ, ЭЗЭНийг магтагтун.