68 ¹Бурхан босож, дайснууд нь таран бутарч,
Түүнийг үзэн ядагчид Түүний өмнөөс зугтаг.
²Утаа замхардгийн адил тэднийг хөөгөөч.
Лааны тос галын өмнө хайлдгийн адил
Хорон муу хүнийг Бурханы өмнө сөнөөгөөч.
³Харин зөв шударга хүмүүсийг баярлуул. Тэднийг Бурханы өмнө баяр хөөр болго.
Тэднийг баясалтайгаар баярлуул.
⁴Бурханд дуул, Түүний нэрийг магтан дуулагтун.
Цөлөөр явагч Түүнд дуугаа өргө.
Түүний нэр бол ЭЗЭН. Түүний өмнө баярлан хөөрөгтүн.

⁵Эцэггүй хүний эцэг нь, бэлэвсний шүүгч нь бол
Өөрийн ариун газартаа буй Бурхан юм.
⁶Бурхан ганцаардагчид зориулан гэрийг бий болгодог.
Тэрээр хоригдогсдыг сайн сайхан уруу дагуулдаг бөгөөд
Зөвхөн тэрслэгчид л хуурай хагарсан газарт оршин суудаг.

⁷Бурхан, Таныг Өөрийн хүмүүсийг манлайлан явахад,
Мөн Таныг цөл дундуур жагсан явахад ⁸Газар хөдөлжээ.
Тэнгэрүүд ч бас Бурханы өмнө бороо дуслуулсан.
Синаи уул өөрөө ч Израилийн Бурхан болох Бурханы өмнө ганхан хөдөлжээ.
⁹Бурхан, Та элбэг баян бороог хайрласан.
Та Өөрийн өвийг доройтоход нь бат бэх болгожээ.
¹⁰Таны бүтээлүүд түүн дотор суурьшсан.
Бурхан, Та Өөрийн сайнаар ядуусыг хангажээ.

¹¹Эзэн тушаал буулгадаг.
Мэдээ тунхаглагч эмэгтэйчүүд олон байна.
¹²“Их цэргүүдийн хаад зугтдаг, тэд зугтдаг бөгөөд
Гэрт үлдсэн эмэгтэй олзыг хуваана”.
¹³Хонины хашаанд хэвтэх үедээ та нар
Мөнгөөр бүрсэн тагтааны жигүүр,
Шижир алтаар бүрсэн өд нь мэт байдаг.
¹⁴Төгс Хүчит Нэгэн тэнд хаадыг тараасан үед
Залмонд цас бударч байв.

¹⁵Бурханы уул бол Башаны уул юм.
Олон өндөр оргилтой уул бол Башаны уул юм.
¹⁶Олон өндөр оргилтой уулс аа,
Бурханы Өөрийн оршин суух газраа болгохыг хүссэн уул уруу
Та нар юунд атаархан харна вэ?
Үнэхээр ЭЗЭН тэнд мөнхөд оршино.
¹⁷Бурханы сүйх тэрэгнүүд мянгаараа, түм түмээр байдаг.
Эзэн Синаид байгаатай адил тэдний дунд ариун байдал дотор байна.
¹⁸Та өндөрт гарч, олзлогдогсдыг дагуулжээ.
Та хүмүүсийн дунд бэлэг авсан,
Тэрслэгчдээс ч авсан нь ЭЗЭН Бурхан тэнд оршин суухын тулд юм.

¹⁹Өдөр бүр бидний ачааг үүрдэг Эзэн,
Бидний аврал болох Бурхан магтагдах болтугай. ²⁰Бидний хувьд Бурхан бол авралын Бурхан юм.
Үхлээс зайлах нь Эзэн болох БУРХАНых юм.
²¹Үнэхээр Бурхан дайснуудынхаа толгойг,
Гэмээ байнга үйлддэг хүний үстэй оройг бяц цохино.
²²Эзэн “Би тэднийг Башанаас авчирна.
Би тэднийг далайн гүнээс буцааж гаргана.
²³Энэ нь хөл чинь тэднийг цусанд нь түйвээж,
Нохдын чинь хэл дайснуудын чинь цуснаас хувь хүртэхийн тулд болой” гэв.

²⁴Бурхан, тэд Таны залран ирэхийг,
Миний хаан болох миний Бурханы ариун газарт залран ирэхийг харсан.
²⁵Шагшуурга шажигнуулах бүсгүйчүүдийн дуунд
Дуучин эхэлж, хөгжимчид дагав.
²⁶Израилиас ундран гардаг та нар аа,
Их чуулганд Бурхан ЭЗЭНийг магтан дуулагтун!
²⁷Тэнд тэднийг удирддаг отгон Бениамин,
Иудагийн ноёд өөрсдийн олон түмэнтэй,
Зебулун ба Нафталийн ноёд тэнд байна.

²⁸Чиний Бурхан чамд хүчийг тушаав.
Бидний төлөө үйлдэж байсан Бурхан, Та Өөрийн хүчийг харуулаач.
²⁹Иерусалим дахь Таны сүмээс болж
Хаад Танд бэлгүүдийг авчирна.
³⁰Хөл доороо мөнгөний өөдсийг гишгэлдэг
Зэгсэн дундах араатнууд болон
Ард түмнүүдийн тугалуудын дундах бухан сүргийг зэмлэ.
Тэрээр дайнд баярлагч хүмүүсийг тараажээ.
³¹Дээдсүүд Египетээс гарч ирнэ.
Етиоп гараа Бурхан уруу хурдан сунгана.

³²Дэлхийн хаанчлалууд аа, Бурханд дуулагтун.
Эзэнд магтан дуулагтун. ³³Эртний үеийн дээд тэнгэрүүдийг хөлөглөгч Түүнд дуулагтун.
Харагтун, Тэрээр сүрлэг дуу хоолойгоор айлддаг.
³⁴Хүч чадлыг Бурханых гэж үз.
Түүний сүр хүч Израилийн дээр,
Түүний хүч чадал тэнгэрт байна.
³⁵Бурхан, Өөрийн ариун газраас Та сүрдмээр байна.
Израилийн Бурхан Өөрөө хүмүүст хүч чадлыг өгдөг.
Бурхан магтагдах болтугай!