13 ¹ЭЗЭН, хэдий болтол юм бэ?
Та намайг үүрд мартах юм уу?
Хэдий болтол Та надаас нүүрээ нуух юм бэ?
²Би хэдий болтол сэтгэлтэйгээ ярьж,
Бүхий л өдөржин зүрхээрээ зовох юм бэ?
Хэдий болтол дайснууд минь миний дээр өргөмжлөгдөх вэ?

³Миний Бурхан ЭЗЭН, тунгаан бодож, надад хариу өгөөч.
Нүдийг минь нээгээч,
Эс тэгвэл би үхлээр нойрсох болно.
⁴Миний дайсан ч “Би түүнийг ялан дийлсэн” гэж,
Намайг ганхах үед миний өстнүүд ч баярлах болно.

⁵Харин би Таны хайр энэрэлд итгэсэн.
Миний зүрх Таны авралд баясах болно.
⁶Би ЭЗЭНд дуулна,
Учир нь Тэр надад өгөөмөр хандсан юм.