105 ¹ЭЗЭНд талархлыг өргөж, Түүний нэрийг дуудагтун.
Түүний үйлсийг ард түмний дунд мэдүүлэгтүн.
²Түүнд дуу, Түүнд магтан дуулагтун.
Түүний бүх гайхамшгуудын тухай тунхагла.
³Түүний ариун нэрээр сайрх.
ЭЗЭНийг эрэн хайгчдын зүрх баяртай байх болтугай.
⁴ЭЗЭНийг хийгээд Түүний хүч чадлыг эрэлхийлэгтүн.
Түүний нүүр царайг үргэлж хайгтун.
⁵Түүний үйлдсэн гайхамшгуудыг нь,
Түүний гайхамшигт юмс болоод Түүний амнаас гарах шүүлтийг санагтун.
⁶Абрахамын үр удам, Түүний зарц,
Иаковын хөвгүүд, Түүний сонгосон хүмүүс ээ!
⁷Тэр бол бидний Бурхан ЭЗЭН юм.
Түүний шүүлтүүд бүх дэлхийд байдаг.

⁸Тэр Өөрийн гэрээг буюу
Мянган үеийнхэнд Өөрийн тушаасан үгийг мөнхөд санасан.
⁹Энэ бол Абрахамтай Түүний байгуулсан гэрээ болон
Исаакт тавьсан Түүний тангараг юм.
¹⁰Тэгээд Тэр түүнийг Иаковд тогтоол болгон,
Израильд мөнхийн гэрээ болгон баталсан юм.
¹¹Ингэхдээ “Би чамд Канаан нутгийг
Та нарын өв залгамжлалын хувь болгон өгнө” гэсэн юм.
¹²Тэгэхэд тэд тоогоор цөөхөн,
Маш цөөхөн бөгөөд тэр нутагт харийн хүмүүс байв.
¹³Тэд үндэстнээс үндэстэн уруу,
Нэг хаанчлалаас өөр хүмүүс уруу тэнүүчилсэн.
¹⁴Тэр тэднийг дарлахыг хэнд ч зөвшөөрөөгүй бөгөөд
Тэдний төлөө хаадыг ч зэмлэн
¹⁵“Миний тослогдогчдод бүү хүр,
Миний эш үзүүлэгчдэд бүү хор хүргэ” гэв.

¹⁶Тэрээр тэр нутагт өлсгөлөнг дуудан ирүүлсэн.
Тэр талхны бүх нөөцийг үгүй болгосон.
¹⁷Тэр тэдний өмнө нэг хүнийг буюу
Боол болон худалдагдсан Иосефыг илгээсэн.
¹⁸Тэд түүний хөлийг дөнгөлсөн.
Тэр өөрөө төмрөөр гинжлэгдсэн.
¹⁹Энэ нь түүний үгс биелэгдэх хүртэл байв.
ЭЗЭНий үг түүнийг туршсан.
²⁰Хаан хүмүүсийг илгээж, түүнийг сулласан,
Үндэстнүүдийн захирагчдыг явуулж түүнийг чөлөөлсөн.
²¹Тэр түүнийг өөрийн гэрийн эзэн,
Өөрийн бүх эзэмшлийн захирагч болгосон.
²²Ингэсэн нь тааллаар ноёдыг хянахын тулд бөгөөд
Түүгээр өөрийн ахлагчдад мэргэн ухааныг заалгахын тулд болой.
²³Израиль ч бас Египетэд ирсэн.
Ингэж Иаков Хамын нутагт түр суусан.
²⁴Тэр Өөрийн ард түмнийг өнөр өтгөн болохыг зөвшөөрч,
Тэднийг өстнүүдээс нь илүү хүчтэй болгосон.

²⁵Тэр тэдний зүрхийг Өөрийнх нь хүмүүсийг үзэн ядахаар
Өөрийнх нь зарц нарыг залилахаар эргүүлсэн.
²⁶Тэр Өөрийн зарц Мосег,
Өөрийн сонгосон Аароныг илгээсэн.
²⁷Тэд хүмүүсийн дунд Түүний гайхамшигт үйлсийг,
Хамын нутагт гайхамшгуудыг үйлдсэн.
²⁸Тэрээр харанхуйг илгээж, харанхуй болгосон.
Тэд Түүний үгсийг эсэргүүцсэнгүй.
²⁹Тэр тэдний усыг цус болгон хувиргаж,
Загасыг нь үхүүлсэн.
³⁰Тэдний нутаг мэлхийгээр дүүрч,
Тэдний хааны ордонд ч орж ирсэн.
³¹Түүнийг айлдсанд ялаан сүрэг,
Бүх нутаг дэвсгэрт нь бөөс орж иржээ.
³²Тэр тэдэнд борооны оронд мөндөр оруулж,
Тэдний нутагт галтай дөлийг буулгасан.
³³Тэр бас тэдний усан үзмийн модод ба инжир моддыг нь хуга цохиж,
Нутаг хязгаарынх нь моддыг цавчсан.
³⁴Түүнийг айлдсанд царцаа буюу
Тоо томшгүй олон залуу царцаа ирж,
³⁵Тэдний нутгийн бүх ногоог,
Газрынх нь үр жимсийг идэж цөлмөсөн.
³⁶Тэр бас тэдний нутгийн бүх ууган хөвгүүдийг,
Тэдний хүч тэнхээний анхны үр жимсийг цохин унагаасан.

³⁷Дараа нь Тэр тэднийг алт мөнгөөр гаргасан бөгөөд
Түүний овгуудын дотор бүдэрсэн хүн нэг ч байгаагүй.
³⁸Тэднийг хөдлөн явах үед Египет баяртай байсан.
Учир нь тэднээс айх айдаст тэд автжээ.
³⁹Тэрээр хөшиг болгон үүлсийг,
Мөн шөнөөр гэрэлтүүлэхээр галыг тараасан.
⁴⁰Тэднийг гуйсанд Тэрээр бөднө шувууг авчирч,
Тэднийг тэнгэрийн талхаар хангасан.
⁴¹Тэрээр хадыг нээсэнд ус олгойдон гарав.
Тэр нь хуурай газруудаар гол мэт урссан.
⁴²Учир нь Тэр Өөрийн ариун үгийг,
Өөрийн зарц Абрахамыг дурсан санасан юм.
⁴³Тэр Өөрийн хүмүүсийг баяр хөөртэйгөөр,
Өөрийн сонгосон хүмүүсийг баярт уухайтайгаар гарган авчирсан.
⁴⁴Тэр бас тэдэнд үндэстнүүдийн газар нутгийг өгсөн нь
Хүмүүсийн хөдөлмөрийг тэднийх болгуулахын тулд юм.
⁴⁵Энэ нь тэднээр Өөрийн зарлигуудыг сахиулж,
Өөрийн хуулиудыг даган мөрдүүлэхийн тулд байв.
ЭЗЭНийг магтагтун.