36 ¹Бурханлаг бус хүнд зүрхэнд нь нүгэлт чанар ярьдаг.
Түүний нүдэнд Бурханаас эмээхүй нь үгүй.
²Учир нь тэр өөрийгөө дөвийлгөж, өөрийн гэм нүглийг илрэхгүй, үзэн ядагдахгүй! гэсэн.
³Түүний амнаас гарах үг нь хорон муухай бөгөөд хуурамч юм.
Тэр мэргэн ухаан ба сайн үйлсээ зогсоосон.
⁴Тэр гэмт хорон санаагаа орондоо төлөвлөдөг.
Тэр өөрийгөө буруу зам дээр зогсоодог.
Тэр бузар үйлийг жигшдэггүй.

⁵ЭЗЭН, Таны энэрэл тэнгэрт бий!
Таны итгэмж огторгуйд ч хүрнэ.
⁶Таны зөв шударга Бурханы уулстай адил,
Таны шүүх бол их далайтай адил.
ЭЗЭН, Та хүн болоод араатныг хамгаалдаг.
⁷Бурхан аа! Таны энэрэл хайр хичнээн үнэтэй вэ!
Хүмүүн Таны жигүүрийн сүүдэр дор хоргоддог.
⁸Тэд Таны өргөөн дэх баялгаар элбэг хангалуун байдаг.
Та тэднийг Өөрийн тааламжит голоос ундаалдаг.
⁹Амийн эх булаг нь Танд бий.
Таны гэрэл гэгээнд л бид гэрэл гэгээг хардаг.

¹⁰Таныг таньж мэдэгчдэд Өөрийн энэрэл хайрыг үргэлжлүүлэн
Шулуун шударга сэтгэлтэнд
Өөрийн зөв шударгыг хүртээгээч!
¹¹Бардамнагчийн хөлийг надад бүү хүргээч!
Муу хүний гараар намайг бүү зайлуулаач!
¹²Гэм хор хийгчид тэнд унасан.
Тэд газар хөсөр унаад, дахин босож чадахгүй!