69 ¹Бурхан, намайг авраач.
Учир нь их ус аминд минь заналхийлсэн.
²Би гүн намагт живсэн бөгөөд тэнд хөл тогтох газар үгүй.
Би гүн усанд орж, үерт автсан.
³Би хашхирсаар байгаад ядарчээ. Хоолой минь хатжээ.
Би Бурханаа хүлээхэд нүд минь гархилсан.
⁴Намайг утга учиргүйгээр үзэн ядагчид толгойн үснээс минь ч олон байна.
Шударга бусаар миний дайсан болон намайг устгах гэгчид хүчтэй байна.
Би хулгайлаагүй зүйлээ буцааж өгөх ёстой болж байна.

⁵Бурхан, миний мунхаглалыг мэддэг нь Та бөгөөд
Миний буруу Танаас нууцлагдаагүй.
⁶Түмэн цэргийн БУРХАН Эзэн,
Таныг хүлээгчид надаас болж ичгүүрт бүү ороосой.
Израилийн Бурхан,
Таныг эрэн хайгчдыг надаас болж шившигт бүү оруулаасай.
⁷Учир нь Таны төлөө би жигшил зэвүүцлийг үүрчээ.
Миний нүүрийг ичгүүр нөмөрсөн.
⁸Би ах дүүстээ харийн хүн болж,
Эхийнхээ хөвгүүдэд ч гаднын хүн болсон.
⁹Таны өргөөний төлөөх хичээл зүтгэл намайг залгиж,
Таныг буруутгасан хүмүүсийн буруутгал надад ирсэн.
¹⁰Намайг мацаг барин сэтгэлдээ уйлахад,
Тэр нь чухамдаа миний шившиг болсон.
¹¹Намайг тааран хувцас өмсөхөд,
Би тэдний хувьд, сургамж яриа болсон.
¹²Дааман хаалганы дэргэд суугчид миний тухай ярьдаг бөгөөд
Би согтуурагчдын дуу нь болсон.

¹³ЭЗЭН, тааламжтай цагт миний залбирлууд Танд ханддаг.
Бурхан, Өөрийн хайр энэрлийн агуу байдлаар
Өөрийн авралын үнэнээр надад хариулаач.
¹⁴Намайг намгаас татан гаргаж, бүү живүүлээч.
Би өөрийн дайснууд болон гүн их уснаас аврагдах болтугай.
¹⁵Би усны үерт үл автаж,
Гүн усанд үл залгиулж,
Миний дээр нүхний ам ч бүү хаагдаасай.

¹⁶ЭЗЭН, Таны хайр энэрэл сайн учир надад хариулаач.
Өөрийн өршөөлийн агуу байдлаар над уруу эргэж,
¹⁷Өөрийн зарцаас нүүрээ бүү нуугаач.
Учир нь би зовлон шаналлын дунд байна. Надад түргэн хариулаач.
¹⁸Сэтгэлд минь ойртон ирж, түүнийг авраач ээ.
Миний дайснуудын учир намайг золиоч!
¹⁹Надад ирсэн буруутгал, ичгүүр болон доромжлолыг Та мэднэ.
Миний бүх өстөн Таны өмнө байна.

²⁰Буруутгал миний зүрхийг эмтэлж, би маш их өвчтэй байна.
Би өрөвдөгчийг найдан харсан боловч хэн ч байгаагүй.
Мөн тайтгаруулагчийг харсан ч хэнийг ч олоогүй.
²¹Тэд бас надад миний хүнсэнд цөсийг,
Намайг цангахад уулгахаар цууг өгсөн.

²²Тэдний өмнөх тэдний ширээ урхи болог.
Тэднийг амар тайван байхад энэ нь хавх болог.
²³Тэднийг харж чадахгүй болгохоор нүд нь харанхуйлах болтугай.
Тэдний ууц нурууг үргэлж чичрүүлээч.
²⁴Өөрийн хилэгнэлийг тэдний дээр асгаач.
Таны дүрэлзэж буй уур тэднийг нөмрөх болтугай.
²⁵Тэдний хуаран хоосрох болтугай.
Тэдний майхнуудад хэн ч бүү оршин сууг.
²⁶Учир нь тэд Таны бут цохисон хүнийг хяхан хавчсан бөгөөд
Тэд Таны шархдуулсан хүний өвчний талаар ярилцдаг.
²⁷Тэдний гэм буруу дээр гэм бурууг нэмээч.
Тэд Таны зөвт байдалд бүү ороосой.
²⁸Тэд амийн номоос хасагдан арчигдаж,
Зөв шударга хүмүүстэй хамт бүү бичигдээсэй.

²⁹Харин би зовж шаналсан бөгөөд өвдөж байна.
Бурхан, Таны аврал намайг өндөрт өргөх болтугай.
³⁰Би Бурханы нэрийг дуугаар магтаж,
Түүнийг талархлаар өргөмжилнө.
³¹Энэ нь ЭЗЭНд үхрээс илүүгээр,
Эсвэл эвэр туурайтай залуу бухнаас илүүгээр таалагдах болно.
³²Даруу хүмүүс үүнийг үзсэн бөгөөд баярлаж байна.
Бурханыг эрэн хайгчид аа, та нарын зүрх сэргэх болтугай.
³³Учир нь ЭЗЭН гачигдагсдыг сонсдог бөгөөд
Өөрийн хоригдлуудыг жигшдэггүй.

³⁴Тэнгэр ба газар,
Далай ба тэдгээрийн дотор хөдөлж буй бүхэн Түүнийг магтаг.
³⁵Учир нь Бурхан Сионыг аварч, Иудагийн хотуудыг босгон байгуулна.
Энэ нь тэднийг тэнд суулгаж, тэдгээрийг эзэмшүүлэхийн тулд юм.
³⁶Түүний зарц нарын үр удмууд үүнийг өвлөж,
Түүний нэрийг хайрлагчид тэнд оршин суух болно.