83 ¹Өө, Бурхан, бүү дуугүй байгаач.
Өө, Бурхан, бүү дуугүй байгаач, бүү нам жим болооч.
²Харагтун, Таны дайснууд шуугьж,
Таныг үзэн ядагчид толгойгоо өргөсөн.
³Тэд Таны хүмүүсийн эсрэг хорон санаатай төлөвлөгөөг гаргаж,
Таны нандигнасан хүмүүсийн эсрэг хамтдаа хуйвалддаг.
⁴Тэд “Израилийн нэр дахин дурсагдахгүйн тулд
Очиж, тэднийг үндэстнээр нь арчиж, үгүй болгоцгооё” гэцгээв.
⁵Тэд нэг оюун бодлоор хамтран хуйвалджээ.
Таны эсрэг тэд гэрээ байгуулдаг.
⁶Едомын майхнууд болон ишмаелчууд,
Моаб болон хагирчууд,
⁷Гебал, Аммон болон Амалек,
Филист, Тирийн оршин суугчидтай хамт
⁸Ассири ч тэдэнтэй холбоо тогтоож,
Тэд Лотын хүүхдүүдэд тус дэм болжээ.
⁹Тэдэнтэй Мидианд үйлдсэн шиг,
Кишон голын урсгалын дэргэд Сисера ба Иабинд үйлдсэн шиг хандаач.
¹⁰Тэд Ен-дорт сөнөөж,
Газарт хаягдах хог мэт болсон.
¹¹Тэдний язгууртнуудыг Ореб ба Зееб шиг,
Тэдний бүх ноёдыг Зеба ба Залмунна шиг болгооч.
¹²Тэд “Өөрсдөдөө зориулан
Бурханы бэлчээрийг эзэмшицгээе” гэцгээж байсан.

¹³Бурхан минь ээ, тэднийг хамхуул шиг,
Салхинд хийсэх сүрэл мэт болгооч.
¹⁴Ойг шатаадаг гал шиг,
Уулсыг шатаадаг дөл шиг
¹⁵Өөрийн хуй салхиар тэднийг хөөж,
Өөрийн шуургаар тэднийг сүрдүүлээч.
¹⁶Тэд Таны нэрийг эрж хайдаг болохын тулд
Тэдний нүүрийг ичгүүрээр дүүргээч.
¹⁷Тэднийг мөнхөд ичгүүрт оруулан айлгаж,
Тэднийг дорд болгон мөхөлд учруулаач.
¹⁸Ингэснээр тэд ЭЗЭН гэдэг нэртэй Та л ганцаараа
Бүх дэлхийн Хамгийн Дээд Нэгэн гэдгийг мэдэх болтугай.