57 ¹Намайг өршөөгөөч, Бурхан, намайг өршөөгөөч.
Учир нь миний сэтгэл Таны дотор хоргоддог.
Таны жигүүрийн сүүдэрт би
Сүйрлийг өнгөртөл хоргодно.
²Би Хамгийн Дээд Бурханд хашхирна.
Тэр бол миний төлөө биелүүлдэг Бурхан.
³Тэрээр тэнгэрээс илгээж, намайг аварна.
Тэр намайг залгихаар завдагчдыг зэмлэдэг. Бурхан Өөрийн хайр энэрэл болон үнэнийг илгээнэ.

⁴Миний сэтгэл арслангуудын дунд байна.
Би амаар гал гаргагчдын дунд хэвтдэг.
Тэд бол хүний хөвгүүд бөгөөд шүд нь жад ба сум,
Хэл нь хурц илд юм.
⁵Бурхан, тэнгэрүүдээс дээгүүр өргөмжлөгдөөч.
Таны сүр жавхлан бүх дэлхийн дээгүүр байг.
⁶Тэд миний хөлд тор тавьсан.
Сэтгэл минь бөхийв.
Тэд миний өмнө нүх ухсан.
Тэд түүний гүн уруу унацгаав.
⁷Зүрх минь бат байна, Өө, Бурхан, зүрх минь бат байна.
Би дуулна, би магтан дуулна.
⁸Зүрх минь, сэрээч!
Босоо ятга болон ятга аа, сэрээч!
Би үүрийн гэгээг сэрээнэ.
⁹Өө Эзэн, би хүмүүсийн дунд Танд талархал өргөнө.
Би үндэстнүүдийн дунд Таныг магтан дуулна.
¹⁰Учир нь Таны хайр энэрэл тэнгэрт тулам агуу бөгөөд
Таны үнэн үүлсэд тулам агуу билээ.
¹¹Өө Бурхан, тэнгэрүүдээс дээгүүр өргөмжлөгдөөч.
Таны сүр жавхлан бүх дэлхийн дээгүүр байг.