91 ¹Хамгийн Дээд Нэгэний халхавчинд оршигч нэгэн
Төгс Хүчит Нэгэний сүүдэр дор амьдарна.
²Би ЭЗЭНд хандан “Миний хоргодох газар, миний бат цайз,
Миний итгэдэг Бурхан минь” гэнэ.
³Учир нь чамайг анчны урхинаас,
Бас үхлийн тахлаас авардаг нэгэн бол Тэр юм.
⁴Тэр чамайг өдөөрөө хучих бөгөөд
Түүний жигүүр дор чи хоргодох болно.
Түүний итгэлтэй байдал бол бамбай болон бэхлэлт юм.

⁵Чи шөнийн аймшгаас ч,
Өдөр исгэрэх сумнаас ч айхгүй.
⁶Мөн харанхуйд явагч тахлаас ч,
Үд дунд цөлжүүлэх мөхлөөс ч айхгүй.
⁷Мянган хүн чиний дэргэд,
Түмэн хүн чиний баруун гар талд унавч,
Энэ нь чамд халдахгүй.
⁸Чи зөвхөн нүдээрээ хараад л
Хорон муу хүнд өгөх хариуг үзэх болно.
⁹Учир нь чи миний хоргодох газар болох ЭЗЭНийг буюу
Хамгийн Дээд Нэгэнийг орших газраа болгосон юм.
¹⁰Ямар ч хор хөнөөл чамд учрахгүй,
Ямар ч гамшиг чиний майханд ойртохгүй.

¹¹Учир нь бүх замд чамайг хамгаалахын тулд
Тэр Өөрийн тэнгэр элч нарт чиний талаар тушаал өгнө.
¹²Чамайг хөлөө чулуунд цохичих вий гэсэндээ
Тэд чамайг гар дээрээ өргөн явна.
¹³Чи арслан, наж могойг гишгэж,
Залуу арслан, могойг хөлөөрөө дэвсэлнэ.

¹⁴“Тэр Намайг хайрласан учраас Би түүнийг аварна.
Тэр Миний нэрийг мэдсэн учраас Би түүнийг өргөмжилнө.
¹⁵Тэр Намайг дуудах бөгөөд Би түүнд хариулна.
Саад бэрхшээлтэй үед Би түүнтэй хамт байна.
Би түүнийг аварч, хүндлэх болно.
¹⁶Би түүнийг урт амьдралаар хангаж,
Түүнд Өөрийн авралыг үзүүлнэ.