18 ¹Миний хүч болох ЭЗЭН, Би танд хайртай.
²ЭЗЭН бол миний хад,
миний цайз,
миний аврагч,
миний Бурхан,
миний хоргоддог хад минь,
миний бамбай,
миний авралын эвэр,
миний бэхлэлт юм.
³Магтуулах зохистой ЭЗЭНийг би дуудаад,
Өөрийн дайснуудаас би аврагдсан.

⁴Үхлийн утас намайг хэрж,
Бурханлаг бусын цутгалууд намайг айлгажээ.
⁵Үхэгсдийн орны утас намайг хүрээлжээ.
Үхлийн урхинууд миний өмнө тулгарчээ.
⁶Өөрийн зовлондоо би ЭЗЭНийг дуудаж,
Өөрийн Бурхан уруу хандан хашхирсанд
Тэр Өөрийн сүмээс миний дуу хоолойг сонсож,
Түүний өмнө буй хашхирах дуу минь Түүний сонорт хүрсэн билээ.

⁷Тэгээд газар дэлхий чичрэн доргив.
Тэрээр уурласнаас болж уулсын суурь ганхан хөдөлсөн.
⁸Түүний хамраас утаа гарч,
Түүний амнаас гал манаран шатаажээ.
Тэрхүү галд нүүрс ноцсон.
⁹Тэрээр тэнгэрийг ч зааглан бууж ирсэн
Харанхуй үүл Түүний хөл дор байна
¹⁰Тэрээр херуб хөлөглөн нисэв.
Тэрээр салхин жигүүр дээгүүр элин халив.
¹¹Тэрээр харанхуйг Өөрийн нуугдах газар,
Усны харанхуй, огторгуйн өтгөн үүлсийг
Өөрийн эргэн тойрон дахь хөшиг болгосон.
¹²Түүний өмнөх гэгээнээс Түүний өтгөн үүлс,
Мөндөр болон галтай нүүрс нүүжээ.
¹³ЭЗЭН бас тэнгэрт хүнгэнэж,
Хамгийн Дээд Нэгэн Өөрийн дуу, мөндөр ба галтай нүүрсийг буулгасан юм.
¹⁴Тэрээр Өөрийн сумнуудаа нисгэн бутрааж,
Аянга цахилгаануудаа үй олноор цахиулж, тэднийг бут ниргэсэн.
¹⁵Тэгээд, ЭЗЭН, Таны зэмлэлд хийгээд
Хамрын тань амьсгалын хүчит цохилтоор
Усны урсгалууд үзэгдэж,
Ертөнцийн сууриуд ил гаргагджээ.

¹⁶Тэрээр дээрээс илгээж, намайг авсан.
Их уснаас Тэр намайг татан гаргасан.
¹⁷Тэр намайг хүчит дайснаас минь болон намайг үзэн ядагчдаас аварсан.
Учир нь тэд миний хувьд дэндүү хүчтэй байв.
¹⁸Тэд зовлон гамшгийн өдөрт минь надтай тулгарсан,
Гэвч ЭЗЭН миний түшиг байв.
¹⁹Мөн Тэр намайг уужим газар уруу аваачсан.
Тэр намайг таалсан учир намайг аварсан билээ.

²⁰ЭЗЭН намайг зөв шударгын минь дагуу шагнасан,
Гарын минь цэвэр байдлаар Тэр надад хариулсан.
²¹Учир нь би ЭЗЭНий замыг баримталж,
Өөрийн Бурханаас хорон муугаар салаагүй.
²²Түүний бүх тогтоолууд миний өмнө байсан бөгөөд
Би Түүний зарлигуудыг өөрөөсөө холдуулаагүй.
²³Би бас Түүний өмнө гэм зэмгүй байж,
Би өөрийгөө гэм нүглээсээ сахин хамгаалсан.
²⁴Тиймээс ЭЗЭН надад зөв шударгын минь дагуу,
Түүний мэлмийд миний гарын цэвэр байдлаар хариулсан.

²⁵Энэрэнгүй хүмүүст Та Өөрийн энэрлийг үзүүлдэг.
Шулуун шударга хүмүүст Та Өөрийн төгс чанарыг үзүүлдэг.
²⁶Цэвэр хүмүүст Та Өөрийн цэвэр байдлыг,
Хуурамч хүмүүст Та Өөрийн овжин байдлаа харуулдаг.
²⁷Та зовж зүдэрсэн хүмүүсийг авардаг,
Харин ихэмсэг харцыг Та номхтгодог.
²⁸Та миний дэнлүүг асаадаг.
Миний Бурхан ЭЗЭН харанхуйг минь гийгүүлж өгдөг.
²⁹Танд түшиглэн би их цэргийн эсрэг гүйж чадна.
Бурхандаа түшиглэн би хана давж чадна.

³⁰Бурханы зам төгс төгөлдөр юм.
ЭЗЭНий үг шалгагдсан.
Өөрийнх нь дотор хоргоддог бүхэнд Тэрээр бамбай юм.
³¹ЭЗЭНээс өөр хэн Бурхан юм бэ?
Бидний Бурханаас өөр хэн хад вэ?
³²Бурхан намайг хүч чадлаар зэвсэглэж,
Миний замыг шулуун болгодог.
³³Тэр миний хөлийг согооных шиг болгож,
Өндөрлөг газруудад минь намайг суулгадаг.
³⁴Тэр миний гарыг тулалдаанд сургадаг нь
Миний гар хүрэл нумыг хөвчилж чадахын тулд юм.
³⁵Та Өөрийн авралын бамбайг надад мөн өгсөн бөгөөд
Таны баруун мутар намайг түшдэг.
Таны дөлгөөн байдал намайг агуу болгодог.
³⁶Та миний алхах замыг өргөсгөдөг,
Тиймээс миний хөл бүдрээгүй.

³⁷Би дайснуудаа нэхэн хөөж, гүйцэж,
Тэднийг сөнөхөөс нааш би эргэсэнгүй.
³⁸Дахин босож чадахгүй болтол би тэднийг бут цохисон.
Тэд миний хөл дор унав.
³⁹Та намайг тулалдаанд бэлтгэн хүч чадлаар зэвсэглэжээ.
Миний эсрэг босогчдыг миний дор Та оруулсан билээ.
⁴⁰Та надад дайснуудын минь шилийг харуулсан бөгөөд
Намайг үзэн ядагчдыг би устгалаа.
⁴¹Тэд хашхирсан боловч аврах хэн ч байгаагүй,
ЭЗЭНд хандсан боловч Тэр тэдэнд хариулаагүй юм.
⁴²Тэгээд салхинд тоос шороо шиг би тэднийг бутаргадаг.
Гудамжны шавар шалбааг шиг би тэднийг цацсан юм.

⁴³Та намайг хүмүүсийн довтлолт халдлагаас аварсан юм.
Та намайг үндэстнүүдийн тэргүүн мэт болгосон.
Миний мэддэггүй хүмүүс надад зарагддаг.
⁴⁴Тэд сонсонгуутаа намайг дагадаг.
Харь хүмүүс надад захирагддаг.
⁴⁵Харь хүмүүс сульдан доройтож,
Бат цайзуудаасаа чичрэн гарч ирдэг.

⁴⁶ЭЗЭН амьд.
Миний хад магтагдах болтугай.
Миний авралын Бурхан өргөмжлөгдөх болтугай.
⁴⁷Тэрээр Миний төлөө өшөө авч,
Надад үндэстнүүдийг захируулдаг Бурхан юм.
⁴⁸Тэр намайг дайснуудаас минь авардаг.
Намайг эсэргүүцэгчдийн дээр Та намайг үнэхээр өргөдөг юм.
Хүчирхийлэгчээс Та намайг авардаг юм.
⁴⁹Тиймээс үндэстнүүдийн дунд би Танд талархаж, ЭЗЭН Таны нэрд би магтаалуудыг дуулна.
⁵⁰Тэр Өөрийн хаанд агуу авралыг өгч,
Өөрийн тослогдогч болох Давид болон түүний үр удамд
Мөнхөд хайр энэрлээ үзүүлдэг болой.