84 ¹Өө, Түмэн цэргийн ЭЗЭН,
Таны оршин суудаг газар хичнээн тааламжтай вэ!
²Миний сэтгэл ЭЗЭНий хашаа уруу тэмүүлэн, эрмэлздэг.
Миний зүрх ба махан бие минь амьд Бурханд баясан хашхирна.
³Миний Хаан ба миний Бурхан,
Түмэн цэргийн ЭЗЭН Таны тахилын ширээнд
Болжмор ч орших газраа,
Хараацай ч өөрийн ангаахайнуудыг суулгах үүрийг олсон.
⁴Таны өргөөнд оршигчид юутай ерөөлтэй вэ!
Тэд үргэлж Таныг магтаж байна.
⁵Хүч нь Таны дотор,
Зүрхэнд нь Сион уруу хөтлөх замууд байх хүн юутай ерөөлтэй вэ!
⁶Нулимсны хөндийгөөр туулан гарахдаа тэд түүнийг булаг болгодог.
Эрт орох бороо ч мөн түүнийг ерөөдөг.
⁷Тэд Сионд Бурханы өмнө үзэгдэн
Хүчээс хүч уруу хүрдэг.

⁸Өө, Түмэн цэргийн Бурхан ЭЗЭН, миний залбирлыг сонсооч.
Өө, Иаковын Бурхан, чих тавин чагнаач. ⁹Хараач, бидний бамбай болсон Бурхан,
Өөрийн тосолсон хүний нүүр уруу хараач.
¹⁰Учир нь Таны хашаан дахь нэг өдөр гадна байх мянган өдрөөс ч дээр юм.
Би хорон муугийн майхнуудад оршин суухаас
Өөрийн Бурханы өргөөний босгон дээр зогсохсон.
¹¹Учир нь ЭЗЭН Бурхан бол нар болон бамбай юм.
ЭЗЭН нигүүлсэл болон алдрыг өгдөг.
Тэрээр шулуун шударгаар явагчдаас ямар ч сайн юмыг нуун дарагдуулдаггүй.
¹²Өө, Түмэн цэргийн ЭЗЭН, Танд итгэдэг хүн юутай ерөөлтэй вэ!