96 ¹ЭЗЭНд шинэ дууг дуулагтун.
Бүх дэлхий ЭЗЭНд дуулагтун.
²ЭЗЭНд дуулж, Түүний нэрийг магтагтун.
Түүний авралын сайн мэдээг өдрөөс өдөрт тунхаглагтун.
³Түүний алдрыг үндэстнүүдийн дунд,
Түүний гайхамшигт үйлсийг бүх ард түмнүүдийн дунд тунхаглагтун.
⁴ЭЗЭН аугаа их учир эрхэм дээдээр магтагдах юм.
Бүх бурхдаас илүүгээр Түүнээс эмээвэл зохино.
⁵Учир нь хүмүүсийн бүх бурхад бол хоосон шүтээнүүд,
Харин ЭЗЭН тэнгэрүүдийг бүтээсэн.
⁶Цог жавхлан ба сүр жавхлан Түүний өмнө,
Хүч чадал ба үзэсгэлэн Түүний ариун газарт байдаг.

⁷Ард түмнүүдийн ургууд аа, ЭЗЭНд өгөгтүн,
ЭЗЭНд алдар ба хүч чадлыг өгөгтүн.
⁸ЭЗЭНд нэрийнх нь алдрыг өгөгтүн.
Өргөл авчирч, Түүний өргөөний хашаанд ирэгтүн.
⁹Ариун байдлын гоо үзэсгэлэнгээр ЭЗЭНд мөргөгтүн.
Бүх дэлхий Түүний өмнө чичрэгтүн.
¹⁰Үндэстнүүдийн дунд “ЭЗЭН захирдаг.
Үнэхээр ертөнц бат бэх тогтоогдсон бөгөөд ганхахгүй.
Тэрээр хүмүүсийг шударга ёсоор шүүнэ” гэж хэл.

¹¹Тэнгэрүүдийг баясгаж, газар дэлхийг баярлуул.
Далай болон түүний доторх бүх юмсыг нүргэлүүл.
¹²Талбай болон түүний доторх бүх юмсыг баясга.
Тэгээд ойн бүх модод ЭЗЭНий өмнө баясан дуулна.
¹³Учир нь Тэр ирж байна,
Учир нь Тэрээр газар дэлхийг шүүхээр ирж байна.
Тэрээр ертөнцийг зөв шударгаар,
Хүмүүсийг Өөрийн итгэлтэй байдлаар шүүнэ.