50 ¹Хүчит Нэгэн, Бурхан, ЭЗЭН айлдаж,
Нар мандахаас жаргах хүртэлх газар дэлхийг дуудсан.
²Үзэсгэлэнгийн дээд болох Сионоос
Бурхан гэрлээ цацруулсан.
³Бидний Бурхан ирээд бүү дуугүй байг.
Түүний урд талд гал шатаж,
Эргэн тойронд нь салхи шуурга шуурна.
⁴Тэр Өөрийн хүмүүсийг шүүхийн тулд
Дээд тэнгэрт болон газар дэлхийг дуудаж
⁵“Миний бурханлаг хүмүүсийг Над уруу цуглуул.
Тэд тахилаар дамжуулан Надтай гэрээ хийсэн юм” гэдэг.
⁶Тэнгэрүүд Түүний зөв шударгыг тунхагладаг,
Учир нь Бурхан Өөрөө шүүгч юм.
⁷“Сонсогтун, Миний хүмүүс ээ, би ярих болно.
Израиль аа, Би чиний эсрэг гэрчилнэ.
Би бол Бурхан, чиний Бурхан билээ.
⁸Би чиний тахилуудаас болж чамайг зэмлэхгүй бөгөөд
Чиний шатаалт тахилууд ч үргэлж миний өмнө байдаг.
⁹Би чиний гэрээс залуу бухыг ч,
Чиний хашаанаас хуцыг ч авахгүй.
¹⁰Учир нь ойн амьтан бүр,
Мянган толгодод бэлчдэг мал сүрэг Минийх юм.
¹¹Би уулын шувуу бүрийг мэддэг бөгөөд
Хээр талд хөдөлдөг бүхэн Минийх юм.
¹²Би өлссөн байсан ч чамд хэлэхгүй байсан.
Учир нь дэлхий болон түүний агуулдаг бүхэн Минийх юм.
¹³Би бухнуудын махыг идэж,
Хуцнуудын цусыг уух гэж үү?
¹⁴Бурханд талархлын өргөлийг өргөж,
Хамгийн Дээд Нэгэнд амлалтуудаа биелүүл.
¹⁵Зовлон зүдгүүрийн өдөр Намайг дууд.
Би чамайг аврах бөгөөд
Чи Намайг хүндэтгэх болно”.

¹⁶Харин хорон муу хүнд Бурхан айлдахдаа
“Миний тогтоолуудыг зарлан,
Миний гэрээг амандаа байлгах ямар эрх чамд байна вэ?
¹⁷Чи сахилгажуулалтыг үзэн ядаж,
Үгсийг минь үл тоодог.
¹⁸Чи хулгайчийг харахдаа түүнд баярладаг бөгөөд
Чи завхайрагчидтай нэгддэг.
¹⁹Чи амаа бузар мууд өгдөг бөгөөд
Чиний хэл заль мэхийг зохиодог.
²⁰Чи сууж, ах дүүсээ муулан ярьдаг.
Чи өөрийн эхийн хүүг гүтгэдэг.
²¹Чамайг эдгээрийг хийхэд Би дуугүй байсан.
Чи Намайг өөртэйгөө адил гэж бодсон.
Би чамайг зэмлэж,
Нүдний чинь өмнө хэргийг чинь дараалан байрлуулна.

²²Бурханыг мартагч та нар аа, одоо үүнийг бодогтун,
Эс тэгвэл Би тастчин хаях бөгөөд та нарыг аврах хүн үгүй байна.
²³Талархлын тахилыг өргөгч нь Намайг хүндэтгэдэг.
Үйлс замналаа засагч хүнд
Би Бурханы авралыг үзүүлнэ.”