Израиль Иудаг сэргээх амлалт
30 1 ЭЗЭНээс Иеремиад үг ирж айлдсан нь 2 “Израилийн Бурхан, ЭЗЭН ингэж айлдаж байна. «Миний чамд айлдсан бүх үгийг номд бич. 3 Учир нь, Би Өөрийн хүмүүс болох Израиль ба Иудагийн сайн сайхныг сэргээх өдрүүд ирж байна» гэж ЭЗЭН тунхаглаж байна. «Би бас тэдний эцэг өвгөдөд өгсөн нутагт та нарыг буцаан авчирч, тэд түүнийг эзэмших болно» гэж ЭЗЭН айлдаж байна.” 4 Израиль болон Иудагийн талаар ЭЗЭНий айлдсан үгс бол эдгээр юм.
5 “Учир нь ЭЗЭН ингэж айлдаж
байна.
«Би аймшиг, айдсын дууг сонссон
бөгөөд
Амар амгалан үгүй.
6 Асуугаад, эрэгтэй хүн хүүхэд
төрүүлж чадах эсэхийг хар.
Яагаад хүүхдээ төрүүлж буй
эмэгтэй шиг
Эрэгтэй хүн бүр гараа бэлхүүсэн
дээрээ тавьсан байхыг
Би харж байна вэ?
Яагаад бүх царай цонхигор болов?
7 Аяа хөөрхий! Тэр өдөр агуу
бөгөөд
Түүнтэй адил өдөр байхгүй билээ.
Энэ бол Иаковын зовлон
шаналангийн үе боловч
Үүнээсээ тэр аврагдана.
8 Тэр өдөр Би хүзүүн дээрээс нь буулгыг нь эвдлэн авч, дөнгийг нь тасална. Харийнхан тэднийг дахин боолоо үл болгоно» гэж түг түмдийн ЭЗЭН айлдаж байна. 9 «Харин тэд Бурхан ЭЗЭНдээ мөн тэдний төлөө Миний босгох хаан Давиддаа үйлчилнэ.
10 Миний зарц Иаков аа, бүү ай» гэж
ЭЗЭН тунхаглаж байна.
«Израиль аа, бүү зүрх алд.
Учир нь харагтун,
Би чамайг алсаас,
Үр удмыг чинь олзлогдсон
нутгаас нь аварна.
Иаков буцан ирж, чимээгүй болж
Тайван байж, түүнийг хэн ч
айлгаж цочоохгүй.
11 Учир нь чамайг аврахын тулд
Би чамтай хамт байна» гэж
ЭЗЭН тунхаглаж байна.
«Учир нь та нарыг дунд нь
тараасан үндэстнүүдээ
Би бүрэн устгах бөгөөд
Зөвхөн чамайг Би бүрэн
устгахгүй.
Гэвч Би чамайг шударгаар гэсгээж,
Чамайг яав ч шийтгэлгүй
орхихгүй»
12 Учир нь ЭЗЭН ингэж айлдаж
байна.
«Шарх чинь эдгэшгүй,
Гэмтэл чинь ноцтой.
13 Хэргийг чинь өмгөөлөх хэн ч
байхгүй.
Яранд чинь эдгэрэл, чамд тэнхрэл
үгүй.
14 Бүх амраг чинь чамайг мартаж,
Тэд чамайг эрэлхийлэхгүй байна.
Учир нь Би чамайг дайсны
шархаар,
Харгис нэгний шийтгэлээр
шархдуулсан нь
Хилэнц чинь их, нүгэл чинь
тоолшгүй олон учраас билээ.
15 Чи юунд гэмтлээсээ болж
хашхирна вэ?
Өвчин шаналал чинь
илааршимгүй,
Хилэнц чинь их, нүглүүд чинь
тоолшгүй олон тул
Би чамд эдгээрийг үйлдэв.
16 Тиймээс чамайг залгигч бүхэн
залгигдах болно.
Бүх дайсан чинь, тэдний хүн
нэгбүр нь
олзлогдон явах болно.
Чамайг тоногчид тонуулах бөгөөд
Чамаас олз ологчид олзонд
өгөгдөх болно.
17 Учир нь Би чамайг тэнхрүүлэн
сэргээнэ.
Чамайг шархнаас чинь эдгээнэ»
гэж
ЭЗЭН тунхаглаж байна.
«Учир нь тэд чамайг
зайлуулагдагч гээд
“Энэ бол Сион.
Түүнийг хэн ч анхаардаггүй”
гэдэг»
18 ЭЗЭН ингэж айлдаж байна.
«Үзэгтүн,
Би Иаковын майхнуудын
сайн сайхныг сэргээн
Амьдардаг газруудад нь
өршөөл үзүүлнэ.
Балгасан дээрээ
хот дахин баригдаж,
Ордон зөв газартаа босох болно.
19 Тэдэн дотроос талархлууд,
Баярлан цэнгэгч хүмүүсийн
дуу хоолой гарна.
Би тэднийг олшруулж,
Тэд цөөрөхгүй.
Бас тэднийг хүндэтгэж,
Тэд өчүүхэн байхаа болино.
20 Тэдний хүүхдүүд бас
урьдынх шигээ байж,
Тэдний хотол түмэн
Миний өмнө тогтоогдоно.
Би бүх дарангуйлагчийг нь
шийтгэнэ.
21 Удирдагч нь тэдний нэг
байх бөгөөд
Захирагч нь тэдний дундаас
гарч ирнэ.
Би түүнийг ойртуулахад
Над уруу тэр дөхөж ирнэ.
Над уруу дөхөж ирэхээр
Хэн амиараа аз туршиж зүрхлэх
билээ?» гэж
ЭЗЭН тунхаглаж байна.
22 «Та нар ард түмэн минь,
Би та нарын Бурхан болно» хэмээв.
23 Үзэгтүн, ЭЗЭНий шуурга!
Уур хилэн, хуйлрах шуурга гарав.
Энэ нь буруутуудын толгой дээр хагарах болно.
24 Тэрээр зүрхнийхээ
зорилгыг биелүүлж,
гүйцэтгэх хүртэл
ЭЗЭНий ширүүн уур хилэн
буцаж эргэхгүй.
Сүүлчийн өдрүүдэд та нар
үүнийг ойлгоно.