Иеремиаг эсэргүүцсэн
Хананиа үхэв
28 1 Тэр жил Иудагийн хаан Зедекиагийн хаанчлалын эхэн буюу дөрөвдүгээр оны тавдугаар сард Гибеоноос гаралтай, Аззурын хүү эш үзүүлэгч Хананиа, ЭЗЭНий өргөөнд тахилч нар болон бүх ард түмний өмнө надад ярихдаа
— 2 Израилийн Бурхан, түг түмдийн ЭЗЭН ингэж айлдаж байна. “Би Вавилоны хааны буулгыг эвдлэв. 3 Вавилоны хаан Небухаднезарын авч яван Вавилонд аваачсан ЭЗЭНий өргөөний сав суулгуудыг Би хоёр жилийн дотор энэ газарт буцааж авчирна. 4 Би мөн Иудагийн хаан, Иехоиакимын хүү Иекониаг болон Вавилон уруу явсан Иудагийн бүх цөлөгдөгчийг энэ газарт буцааж авчирна” гэж ЭЗЭН тунхаглаж байна. “Учир нь Би Вавилоны хааны буулгыг эвдэлнэ” хэмээв гэж хэлэв. 5 Тэгээд эш үзүүлэгч Иеремиа эш үзүүлэгч Хананиад, ЭЗЭНий өргөөнд зогсож байсан тахилч нар болон бүх ард түмний өмнө ийн ярив. 6 Эш үзүүлэгч Иеремиа
—Амен! ЭЗЭН ингэж үйлдэх болтугай. ЭЗЭНий өргөөний сав суулгууд болон бүх цөлөгдөгчийг Вавилоноос энэ газарт буцааж авчрахаар эш үзүүлсэн үгсийг чинь ЭЗЭН батлах болтугай. 7 Гэсэн ч чамайг болон бүх ард түмнийг сонсож байхад миний хэлэх гэж буй энэ үгийг сонсогтун! 8 миний өмнө болон та нарын өмнө байсан эш үзүүлэгчид эрт цагаас олон нутгийн эсрэг, их хаанчлалуудын эсрэг, дайн, гай гамшиг болон тахлын тухай эш үзүүлж байсан. 9 Амар амгалангийн талаар эш үзүүлдэг эш үзүүлэгчийн хувьд, тэр эш үзүүлэгчийн үг биелэгдэх үед үнэхээр ЭЗЭНий илгээсэн нэгэн гэж мэдэгдэх болно гэж хэлэв. 10 Тэгэхэд эш үзүүлэгч Хананиа эш үзүүлэгч Иеремиагийн хүзүүнээс өнөөх буулгыг авч эвдлэв. 11 Хананиа бүх ард түмний өмнө ярьж,
—ЭЗЭН ингэж айлдаж байна. “Би үүнчлэн Вавилоны хаан Небухаднезарын буулгыг бүх үндэстний хүзүүнээс хоёр бүтэн жилийн дотор эвдэлнэ” гэжээ. Тэгээд эш үзүүлэгч Иеремиа замаараа одов. 12 Эш үзүүлэгч Хананиа эш үзүүлэгч Иеремиагийн хүзүүнээс өнөөх буулгыг эвдэлсний дараа ЭЗЭНий үг Иеремиад ирж,
— 13 Явж, Хананиатай ярин “ЭЗЭН ингэж айлдаж байна. «Чи модон буулгануудыг эвдэлсэн боловч тэдний оронд чи төмөр буулгануудыг хийв» хэмээв. 14 Учир нь Израилийн Бурхан, түг түмдийн ЭЗЭН ингэж айлдаж байна. «Эдгээр бүх үндэстнийг Вавилоны хаан Небухаднезарт үйлчлүүлэхийн тулд Би тэдний хүзүүнд төмөр буулгыг тохов. Тэд түүнд үйлчлэх болно. Би бас түүнд талын араатан амьтдыг ч өгсөн билээ»” гэж айлдав. 15 Тэгээд эш үзүүлэгч Иеремиа эш үзүүлэгч Хананиад
—Хананиа, одоо сонс, ЭЗЭН чамайг илгээгээгүй бөгөөд чи энэ хүмүүсийг худал юманд итгүүлэв. 16 Тиймээс ЭЗЭН ингэж айлдаж байна. “Үзэгтүн, Би чамайг газрын гадаргаас зайлуулах гэж байна. Чи ЭЗЭНий эсрэг тэрслэлийг зөвлөсөн тул энэ жил чи үхэх болно” гэж хэлжээ. 17 Ингээд эш үзүүлэгч Хананиа яг тэр жилийн долдугаар сард үхэв.