12 1 Ефраим салхиар хооллон
Дорнын салхийг
үргэлж мөшгөж байна.
Тэрээр заль мэх, хүчирхийллийг
олшруулж байна.
Тэр Ассиритай гэрээ байгуулж,
Египет уруу тос зөөдөг.
Эсэргүүцлийн түүхэн улбаа
2 ЭЗЭН бас Иудатай заргалдаж,
Иаковыг замуудынх нь дагуу
шийтгэнэ.
Тэр үйлдлүүдийнх нь дагуу
Түүнд эргүүлэн төлөх болно.
3 Хэвлийд байхдаа тэр
ахыгаа өсгийнөөс нь барьж,
Эрийн цээнд хүрээд Бурхантай
тэмцэлдсэн.
4 Тийм ээ, тэр тэнгэрэлчтэй
барилдан дийлсэн.
Тэрээр уйлан өршөөл гуйсан.
Тэр Түүнийг Бетелд олоод
Тэр тэнд бидэнтэй ярьсан.
5 Тэр нь түг түмдийн ЭЗЭН Бурхан,
Түүний дурсгалт нэр нь ЭЗЭН.
6 Тиймээс Бурхандаа буц,
Хайр энэрэл, шударга ёсыг сахиж,
Үргэлж Бурханаа хүлээ.
7 Гартаа хуурамч жинлүүртэй
худалдаачин
залилах дуртай.
8 Ефраим “Үнэхээр би баян болсон.
Би өөртөө эд баялгийг олсон.
Бүх хүч хөдөлмөр дотор минь
Нүгэл гэхээр хилэнцийг тэд
надаас олохгүй” гэсэн.
9 Гэвч Египет газарт байх үеэс
Би Бурхан ЭЗЭН чинь байсан.
Товлогдсон найрын
өдрүүдийнх шиг
Би та нарыг дахин
майхнуудад амьдруулах
болно.
10 Би бас эш үзүүлэгчдэд айлдан
Үзэгдлүүдийг олшруулсан.
Эш үзүүлэгчдээр дамжуулан
Би зүйр сануулгуудыг өгсөн.
11 Гилеадад ёс бус юм байна уу?
Үнэхээр тэд хоосон юм.
Гилгалд тэд бухнуудыг
тахиж байна.
Тийм ээ, тахилын ширээнүүд нь
Тариан талбайн
шангуудын хажуудах
чулуун овоонууд шиг юм.
12 Одоо Иаков,
Арамын нутаг уруу зугтаж,
Израиль эхнэрийнхээ төлөө
ажилласан.
Эхнэрийнхээ төлөө
хонин сүргийг манасан.
13 Харин эш үзүүлэгчээр дамжуулан,
Израилийг Египетээс
ЭЗЭН гаргаж,
Эш үзүүлэгчээр дамжуулан
тэр хамгаалагдсан.
14 Ефраим гашуун уур хилэнг
өдөөн хатгасан.
Тиймээс Эзэн цусны бурууг
өөр дээр нь орхиж,
Зэмлэлийг нь өөрт нь буцааж
өгнө.