Тооллого

Канааны хил

34 ¹ Дараа нь ЭЗЭН, Мосетэй ярин

— ² Израилийн хөвгүүдэд тушаан, тэдэнд ийн хэлтүгэй. “Та нарыг Канаан нутагт орох үед та нарт өв болон буух нутаг буюу Канааны нутаг нь хил хязгаарынхаа дагуу энэ болой. ³ Танай өмнөд тал Зиний цөлөөс Едомын хажууг дагах бөгөөд өмнөд хил чинь Давст тэнгисийн адгаас зүүн тийш үргэлжлэх ажгуу. ⁴ Танай хил өмнөдөөс Акраббимын өндөрлөг тийш чиглэн эргэж Зинээр үргэлжлэх бөгөөд түүний адаг нь Кадеш-барнеагаас өмнө зүгт байж, Хазар-аддарт хүрч Азмон уруу үргэлжлэх болой. ⁵ Уг хил Азмонаас Египетийн горхи уруу чиглэн эргэж, адаг нь далайд байх ёстой.

 ⁶ Баруун хилийн тухайд, та нарт Их тэнгис байгаа бөгөөд энэ нь та нарын баруун хил болох юм.

 ⁷ Танай хойд хил энэ болой. Та нар хилийн шугамыг Их тэнгисээс Хор уулыг хүртэл татах болой. ⁸ Хор уулаас та нар Лебо-хамат хүртэл татах бөгөөд хилийн адаг Зедадад байх ёстой. ⁹ Уг хил Зифрон уруу гарч, адаг нь Хазар-енанд байх болой. Энэ нь танай хойд хил хязгаар болох юм.

 ¹⁰ Зүүн хилдээ зориулж та нар Хазар-енанаас Шефамыг хүртэл шугам тат. ¹¹ Уг хил нь Шефамаас Аины зүүн талаар Рибла уруу уруудна. Хил уруудан үргэлжилсээр, Хиннеретийн тэнгисийн зүүн талд буй налууд хүрэх болой. ¹² Уг хил Иордан уруу уруудах бөгөөд адаг нь Давст тэнгист байх болой. Эргэн тойрны бүх хилийнхээ дагуу танай нутаг энэ ажгуу” гэж айлдав.

  ¹³ Мосе, Израилийн хөвгүүдэд тушаан хэлэхдээ

—Есөн овог болон хагас овогт өгөхөөр ЭЗЭНий тушаасан, эзэмшил чинь болж та нарын дунд шавгаар тэнцүү хуваагдах газар энэ болой. ¹⁴ Учир нь Реубений хөвгүүдийн овог эцгүүдийнхээ бүлийн дагуу мөн Гадын хөвгүүдийн овог эцгүүдийнхээ бүлийн дагуу өөрсдийнхийгөө авч, Манассегийн хагас овог эзэмшилээ хүлээн авсан болой. ¹⁵ Хоёр овог болон хагас овог Иерихогийн харалдаа Иорданы чанадад буюу зүүн тийш наран мандах зүгт эзэмшилээ авсан болой гэв.

Овгийн удирдагчид

¹⁶ Дараа нь ЭЗЭН, Мосетэй ярин

— ¹⁷ Та нарт уг нутгийг хуваан өгөх хүмүүсийн нэрс нь тахилч Елеазар, Нуны хүү Иошуа нар юм. ¹⁸ Нутгийг өв болгон хуваахын тулд та нар овог бүрээс нэг удирдагчийг авагтун. ¹⁹ Тэр хүмүүсийн нэрс нь Иуда овгоос Иефуннегийн хүү Калеб, ²⁰ Симеоны хөвгүүдийн овгоос Аммихудын хүү Самуел, ²¹ Бениамин овгоос Хислоны хүү Елидад, ²² Даны хөвгүүдийн овгоос удирдагч, Иоглигийн хүү Букки, ²³ Иосефын хөвгүүдийн хувьд Манассегийн хөвгүүдийн овгоос удирдагч, Ефодын хүү Ханниел, ²⁴ Ефраимын хөвгүүдийн овгоос удирдагч, Шифтаны хүү Кемуел, ²⁵ Зебулуны хөвгүүдийн овгоос удирдагч, Парнахын хүү Елизафан, ²⁶ Иссахарын хөвгүүдийн овгоос удирдагч, Аззаны хүү Палтиел, ²⁷ Ашерын хөвгүүдийн овгоос удирдагч, Шеломын хүү Ахихуд, ²⁸ Нафталийн хөвгүүдийн овгоос удирдагч, Аммихудын хүү Педахел нар болой гэж айлдав. ²⁹ Эд Канаан нутагт Израилийн хөвгүүдэд өвийг хуваан өвлүүлэхээр ЭЗЭНий тушаасан хүмүүс байлаа.