Зарц Мосе, Хүү Христ
3 1 Тиймд тэнгэрлэг дуудлагыг хуваалцагч ариун ах дүү нар аа, бидний хүлээн зөвшөөрдөг Элч ба Тэргүүн Тахилч болох Есүсийг ажицгаа. 2 Түүний [бүх] гэрт Мосе итгэмжит байсны адил Тэр Өөрийг нь томилсон Нэгэнд итгэмжит байсан юм. 3 Учир нь барилгачин барилгаасаа илүү хүндэтгэл хүлээдгийн адил Мосегээс илүү их алдрыг Тэр хүртэх зохистойд тооцогдсон юм. 4 Учир нь аливаа барилга хэн нэгнээр баригддаг. Харин бүх юмсыг барьсан нь Бурхан мөн. 5 Учир нь хожим яригдах ёстой гэрчлэлийн төлөө Мосе үйлчлэгчийн хувьд Түүний бүх гэрт итгэмжит байсан. 6 Харин Христ, Хүүгийн хувьд Түүний гэрт итгэмжит юм. Бид зориг болон найдварын сайрхалаа эцэс хүртэл бат сахиваас бид Түүний гэр болой.
Итгэлгүйн эсрэг сэрэмжлүүлгэ
7 Тиймээс Ариун Сүнсний хэлсэнчлэн болжээ.
“Өнөөдөр та нар Түүний
дууг сонсвол,
8 Цөл дэх сорилтын өдрийн
тэрслэл дэх шиг
Та нар зүрхээ бүү хатууруул.
9 Үйлсийг минь дөчин жил
харсан хэрнээ
Эцгүүд чинь Намайг сорьсон.
10 Тиймд Би тэр үеийнхэнд уурлаж,
«Тэд зүрхэндээ үргэлж төөрөлддөг
Тэд замуудыг минь мэдсэнгүй»
гэж хэлээд,
11 Тиймээс Би хилэн дотроо
«Миний амралтад тэд эс орно» гэж андгайлав”
гэсэн байдаг. 12 Ах дүү нар аа, та нараас хэн нэг нь ёрын, итгэлгүй зүрхтэй байж, амьд Бурханаас салах вий хэмээн болгоомжлогтун. 13 Харин “өнөөдөр” гэгдэж л байгаа бол бие биенээ өдөр бүр зоригжуулагтун. Эс бөгөөс та нараас хэн нэгэн чинь нүглийн мэхлэлээр хатуурах вий. 14 Учир нь бид итгэлийнхээ эхлэлийг эцсээ хүртэл бат сахиваас Христийн хуваалцагчид болсон байна. 15 Энэ нь
“Өнөөдөр та нар Түүний
дууг сонсвол,
Тэрслэл дэх шиг
зүрхээ бүү хатууруул”
гэсэнчлэн юм. 16 Сонссон атал тэрсэлсэн нь хэн билээ? Үнэндээ Мосегийн дор Египетээс гарсан тэд бүгдээрээ биш гэж үү? 17 Тэр дөчин жилийн турш хэнд хилэгнэв? Нүгэл үйлдэж, цөлд бие нь унагсдад биш үү? 18 Өөрийнхөө амралтад эс оруулна гэж Тэр хэнд андгайлсан бэ? Дуулгаваргүй байсан тэдэнд биш үү? 19 Итгэлгүй учир тэд орж чадаагүйг бид хардаг.