9 ¹Тэгэхэд Иов хариулан
²-Тийм байдаг гэдгийг үнэндээ би мэднэ.
Харин Бурханы өмнө хүн хэрхэн зөвт байж чадах билээ?
³Хэрэв хэн нэгэн Түүнтэй маргахыг хүсвэл,
мянгаас нэг удаад ч тэрээр Түүнд хариулж үл чадна.
⁴Зүрхээрээ мэргэн, хүч чадлаараа төгөлдөр Түүнийг
ямар ч хохиролгүйгээр хэн эсэргүүцэж байсан бэ?
⁵Тэднийг мэдэхгүй байхад Өөрийн уурандаа тэдгээрийг хөмрүүлэх үедээ
Тэрээр уулсыг ч хөдөлгөдөг билээ.
⁶Тэрээр газар дэлхийг ч байрнаас нь сэгсэрч,
баганануудыг нь ганхуулдаг.
⁷Түүнийг тушаахад нар манддаггүй бөгөөд
тэрээр оддыг лацаддаг.
⁸Тэрээр Өөрөө тэнгэрүүдийг сунган татаж,
далайн давалгаануудыг доош гишгэчдэг.
⁹Тэрээр Долоон бурхан, Мичид,
Марлын ордыг болон өмнөдийн ордуудыг бүтээсэн билээ.
¹⁰Тэрээр ухааршгүй агуу зүйлс хийгээд
тоо томшгүй гайхамшгуудыг бүтээж байдаг.
¹¹Түүнийг миний хажуугаар өнгөрөх байсан бол
би Түүнийг харахгүй байх байсан.
Түүнийг цаашаа өнгөрөх байсан бол
би Түүнийг ажиглахгүй байх байсан.
¹²Тэрээр шүүрэн авах байсан бол
хэн Түүнийг саатуулж чадах байсан бэ?
Хэн Түүнд “Та юу хийж байна вэ?” гэж хэлж чадах байсан бэ?

¹³Бурхан Өөрийн уураа буцаахгүй.
Рахабын туслагч нар Түүний дор сөхөрдөг юм.
¹⁴Тэгэхээр би Түүнд хэрхэн хариулж,
Түүний өмнө үгсээ сонгох вэ?
¹⁵Хэдийгээр би зөв байсан ч би хариулж чадахгүй байв.
Шүүгчийнхээ өршөөлийг би гуйх байсан.
¹⁶Хэрэв би дуудаж, Тэрээр надад хариулсан бол
миний дуу хоолойг Тэр сонссон гэдэгт би итгэж чадахгүй байсан.
¹⁷Учир нь Тэр намайг шуургаар довтолж,
шалтгаангүйгээр миний шархнуудыг ихэсгэдэг.
¹⁸Тэрээр амьсгаа авахыг ч надад зөвшөөрдөггүй,
харин намайг уй гашуугаар дүүргэдэг.
¹⁹Хэрэв хүчний талаар бол,
харагтун, Тэрээр хүчит нэгэн юм!
Хэрэв шударга ёсны талаар бол,
хэн Түүнийг дуудаж чадах вэ?
²⁰Би хэдий зөвт ч гэсэн
миний ам намайг буруутгах болно.
Би хэдийгээр буруугүй ч гэсэн
Тэрээр намайг буруутай гэж тунхаглах болно.
²¹Би буруугүй.
Би өөрийнхөө талаар санаа тавьдаггүй.
Би амьдралаа жигшдэг.
²²Бүгд ялгаагүй.
Тиймээс би “Тэрээр буруугүйг ч, хорон мууг ч устгадаг” гэж хэлдэг юм.
²³Хэрэв ташуур гэнэтхэн хөнөөдөг бол
Тэрээр гэмгүй нэгний цөхрөлийг элэглэдэг юм.
²⁴Газар дэлхий хорон муу хүмүүсийн гарт өгөгдсөн юм.
Тэрээр шүүгч нарынх нь нүүрийг бүтээдэг.
Хэрэв үгүй бол, тэгвэл тэр нь хэн байх билээ?

²⁵Миний өдрүүд гүйгчээс ч илүү хурдан юм.
Тэд зугтан оддог, тэд сайныг ер үздэггүй.
²⁶Тэд хулсан завьнууд мэт,
олз уруугаа шумбан дайрах бүргэд мэт өнгөрөн оддог.
²⁷Хэдийгээр би “Би гомдлоо мартаж, гунигт төрхөө орхиж,
хөгжөөнтэй байя” гэж хэлдэг ч
²⁸би бүх өвчин зовлонгоосоо айдаг бөгөөд
Та намайг гэмгүй гэж тооцохгүй гэдгийг би мэднэ.
²⁹Би хорон муу гэж тооцогдсон,
тэгвэл юунд дэмий хоосон зүтгэх юм бэ?
³⁰Би өөрийгөө цасаар угааж,
гараа шүлтээр цэвэрлэлээ ч,
³¹Та намайг нүхэнд унагах байсан бөгөөд
өөрийн хувцас минь ч надад эгдүүцэх байсан.
³²Бид хамтдаа шүүх уруу явж
би Түүнд хариулж өгөхөөр Тэр над шиг хүн биш.
³³Бид хоёрын дээр гараа тавих шүүгч бидний дунд байхгүй.
³⁴Тэр Өөрийн саваагаа надаас холдуулж,
Түүний аймшиг намайг бүү түгшүүлэг.
³⁵Би Түүнээс эмээлгүй ярихсан.
Гэвч би өөрийн дотроо үүнтэй адилгүй билээ.