12 ¹Тэгэхэд Иов хариулан
²-Та нар үнэхээр хүмүүс бөгөөд
та нартай хамт мэргэн ухаан мөхөх болно!
³Надад ч бас та нарын адил оюун ухаан бий.
Та нараас дутах юм надад үгүй.
Энэ мэтийг хэн мэддэггүй юм бэ?
⁴Бурханыг дуудаж, Түүнээс хариу авсан нэгэн болох би
найз нөхдийнхөө доог тохуу юм.
Зөв шударга, гэм зэмгүй нь ч доог тохуу юм.
⁵Тайван байгчид гай зовлонг хөл нь халтирдаг хүмүүст бэлтгэгдсэн хэмээн тохуурхдаг билээ.
⁶Сүйтгэгчдийн майхнууд хөгжин цэцэглэдэг бөгөөд
өөрсдөд нь хүчийг авчирдаг Бурханыг өдөөн хатгагчид аюулгүй байдаг.

⁷Харин одоо араатан амьтдаас асуу, тэд чамд сургаг.
Мөн тэнгэрийн шувуудаас асуу, тэд чамд хэлж өгөг.
⁸Эсвэл газар дэлхийтэй ярилцаж,
тэрээр чамд сургаг.
Далайн загас чамд тунхаглаг.
⁹ЭЗЭНий мутар үүнийг хийсэн гэдгийг
эдгээр бүгдийн дунд хэн мэддэггүй юм бэ?
¹⁰Түүний мутарт алив амьд бүхний амь хийгээд
бүх хүн төрөлхтний амьсгал байдаг.
¹¹Ам хоолоо амталдгийн адил чих үгийг нягталдаг бус уу?
¹²Мэргэн ухаан ахмад настангуудтай байдаг бөгөөд
урт удаан амьдрал бол ухаарал юм.

¹³Мэргэн ухаан хийгээд хүч Түүнтэй хамт байх бөгөөд
зөвлөгөө хийгээд ухаарал Түүнд харьяалагддаг.
¹⁴Үзэгтүн, Тэрээр нураадаг бөгөөд
тэр нь сэргээн босгогдож чаддаггүй.
Тэрээр хүнийг шоронд хорьдог бөгөөд
суллагдах арга байдаггүй аж.
¹⁵Үзэгтүн, Тэрээр их усыг хорьдог бөгөөд тэд хуурайшдаг.
Тэрээр тэднийг гадагш илгээдэг бөгөөд
газар дэлхий усанд автдаг аж.
¹⁶Хүч чадал хийгээд мэргэн ухаан Түүнтэй хамт бөгөөд
төөрөлдөгч хийгээд төөрөлдүүлэгч нь Түүнд харьяалагддаг юм.
¹⁷Тэрээр зөвлөхүүдийг хөл нүцгэн явуулж,
шүүгчдийг ч тэнэгүүд болгодог.
¹⁸Тэрээр хаадын хүлээсүүдийг сулладаг бөгөөд
тэдний ууцыг бүсээр бүсэлдэг.
¹⁹Тэрээр тахилч нарыг хөл нүцгэн явуулж,
хүчирхэг хүмүүсийг ч хөмөрдөг.
²⁰Тэрээр итгэлт хүмүүсийн хэлэх үгсийг үгүй болгож,
ахмадуудын гярхай ухааныг ч зайлуулдаг.
²¹Тэрээр язгууртнууд дээр жигшүүрийг асгаж,
хүчтэнүүдийн бүсийг сулруулдаг аж.
²²Тэрээр харанхуйгаас гүн зүйлсийг илчилж,
гүн харанхуйг гэрэлд авчирдаг аж.
²³Тэрээр үндэстнүүдийг агуу болгодог бөгөөд
дараа нь тэднийг устгадаг.
Тэрээр үндэстнүүдийг тархаадаг бөгөөд
дараа нь тэднийг авч явдаг.
²⁴Тэрээр нутгийн ард олны тэргүүнүүдийн ухааныг үгүй болгодог бөгөөд
замгүй цөлд тэднийг тэнүүчлүүлдэг.
²⁵Тэд гэрэлгүй харанхуйд тэмтчин явдаг бөгөөд
Тэр тэднийг согтуу хүн мэт гуйвуулдаг аж.