33 ¹Ямар ч байсан, Иов оо,
одоо миний яриаг сонсож,
бүх үгсийг минь чагнаач.
²Одоо харагтун, би амаа нээж,
миний аман доторх хэл ярьдаг.
³Миний үгс бол зүрхний минь зөвт байдал бөгөөд
уруул минь чин үнэнээсээ мэдлэгийг өгүүлдэг.
⁴Бурханы Сүнс намайг бүтээсэн бөгөөд
Төгс Хүчит Нэгэний амьсгал надад амь өгдөг билээ.
⁵Чаддаг юм бол хариул.
Миний өмнө Өөрийгөө бэлдээд, сөрөн зогс.
⁶Үзэгтүн, би чамтай адил Бурханд харьяалагддаг.
Би ч гэсэн шавраар бүтээгдсэн билээ.
⁷Үзэгтүн, надаас айх хэрэггүй,
миний дарамт ч чамд хүнддэх ёсгүй.

⁸Үнэхээр чи миний чихэн дээр ярьсан бөгөөд
үгсийг би сонссон билээ.
⁹“Би цэвэр, нүгэлгүй.
Би гэмгүй бөгөөд миний дотор гэм буруу байхгүй.
¹⁰Харагтун, Тэрээр л миний эсрэг өс хонзон санаж,
намайг Өөрийн дайснаа хэмээн тооцдог.
¹¹Тэрээр хөлийг минь дөнгөлж,
алхах бүрийг минь харуулддаг”.
¹²Үзэгтүн, би чамд хэлье,
үүнд чи буруутаж байна.
Учир нь Бурхан хүнээс агуу билээ.

¹³Хийсэн бүгдээ тайлагнадаггүй хэмээн
юунд чи Түүний эсрэг гомдоллоно вэ?
¹⁴Бурхан нэг янзаар, мөн нөгөө янзаар дахин хэлдэг боловч үнэндээ хэн ч анзаардаггүй.
хэн ч үүнийг ойшоодоггүй юм.
¹⁵Гүн нойр хүмүүсийг хучин,
хүмүүс орондоо дуг хийх зуур тэдэн дээр гүн нойр ирэхэд
зүүд буюу шөнийн үзэгдэл дотор,
¹⁶тэгэхэд л Тэрээр хүний чихийг нээж,
тэдний заавруудыг битүүмжилдэг нь
¹⁷Тэрээр хүнийг явдлаас нь эргүүлж,
бардамналаас барихын тулд билээ.
¹⁸Тэрээр хүний сэтгэлийг нүхнээс,
түүний амийг Үхэгсдийн оронд орохоос буцаан татдаг.

¹⁹Хүн бас орон дотроо өвчин шаналлаар,
ясандаа ихсэж буй янгиналаар шийтгэгдсэн билээ.
²⁰Ингэснээр түүний амь талхыг,
түүний сэтгэл дуртай хоолоо жигшдэг.
²¹Түүний махан бие ядраад хатан хорчийж,
харагддаггүй байсан яснууд нь ил гарч ирдэг.
²²Тэгээд түүний сэтгэл нүхэнд,
түүний амь үхлийг авчрагчид уруу ойртдог ажээ.

²³Хэрэв тэр хүнд зөвийг нь мэдүүлж өгөхөөр
түүний төлөө зуучлагч тэнгэр элч мянгын дунд нэг байвал,
²⁴тэр нь өнөөх хүнийг нигүүлсэж,
“Нүхэнд унахаас түүнийг авар.
Би золиосыг олов” хэмээг.
²⁵Түүний махан бие залуу үеийнхээс ч илүү сэргэг болог.
Тэрээр залуугийнхаа хүч тэнхээтэй өдрүүдэд буцаж очиг.
²⁶Тэгэхэд тэрээр Бурханд залбирах бөгөөд
Бурхан түүнийг хүлээн авна.
Ингэснээр тэрээр Түүний нүүр уруу баяртайгаар харах бөгөөд
Тэр Өөрийн үнэн зөвийг хүнд сэргээх болно.
²⁷Тэрээр хүмүүст дуулж
“Би нүгэл хийж, зөвийг үгүйсгэсэн бөгөөд
энэ нь надад ханамжийг өгсөнгүй.
²⁸Тэрээр миний сүнсийг нүхэнд унахаас зольсон бөгөөд
миний амь гэрлийг үзнэ” гэх болно.

²⁹Үзэгтүн, Бурхан үүнийг хүнд олонх тохиолдолд үйлддэг нь
³⁰түүний сэтгэлийг нүхнээс буцаан авчрахын тулд бөгөөд
тэрээр амийн гэрлээр гийгүүлэгдэхийн тулд болой.
³¹Анхаарлаа хандуул, Иов оо! Намайг сонс.
Дуугүй байж, намайг яриул.
³²Чамд хэлэх зүйл байвал надад хариул.
Чамайг зөвтгөхийг би хүсэж байгаа учраас ярь.
³³Хэрэв үгүй бол намайг сонс.
Дуугүй бай, би чамд мэргэн ухааныг сургая гэв.