6 ¹Тэгэхэд Иов хариулж
²-Өө, миний уй гашуу үнэндээ хэмжигдэж,
миний сүйрлийн хамт жин хэмжүүр дээр тавигдах ч болоосой!
³Тэгвэл тэр нь далай тэнгисийн элснээс ч илүү хүнд байхсан.
Тиймээс миний үгс яаруу байна.
⁴Төгс Хүчит Нэгэний сумнууд миний дотор байгаа бөгөөд
тэдний хорыг сүнс минь ууж байна.
Бурханы аймшгууд миний эсрэг жагсжээ.
⁵Өвстэй бол хулан орилох уу?
Тэжээлтэй бол үхэр мөөрөх үү?
⁶Амтгүй зүйлийг давслахгүйгээр идэж чаддаг бил үү?
Өндөгний цагаанд амт байдаг бил үү?
⁷Тэдгээрт хүрэхээс сэтгэл минь татгалзаж байна.
Миний хувьд, тэд балиар муухай хоол мэт юм.

⁸Өө, миний хүсэлт биелэгдэж,
Бурхан миний тэмүүллийг өгч соёрхох ч болоосой!
⁹Бурхан намайг няцлахыг хүссэн байгаад
Тэрээр Өөрийн мутраа сул тавин, намайг тастан хаяасай!
¹⁰Гэсэн ч энэ нь надад тайтгарал болсоор байдаг бөгөөд
би хөнөөлт өвчинд баярлан хөөрдөг.
Учир нь би Ариун Нэгэний үгсийг үгүйсгээгүй юм.
¹¹Би хүлээхийн тулд надад ямар хүч байгаа вэ?
Миний төгсгөл ямар болоод би тэсэх ёстой билээ?
¹²Миний хүч хад чулууны хүч үү?
Миний бие хүрэл үү?
¹³Миний тусламж миний дотор байхгүй нь энэ үү?
Аврал нь надаас зайлуулагдсан нь энэ үү?

¹⁴Цөхөрсөн хүн Төгс Хүчит Нэгэнээс эмээхээ мартахгүйн тулд
түүнд анд нөхдөөс нь энэрэл байх болой.
¹⁵Ах дүүс минь горхи мэт,
ширгэдэг горхинуудын цутгалан мэт итгэлгүйгээр үйлджээ.
¹⁶Тэд мөстсөн үедээ булингартай бөгөөд
дотроос нь цас хайлдаг.
¹⁷Усгүй болохдоо тэд дуугүй болж,
халуун болоход тэд байрнаасаа алга болдог.
¹⁸Тэдний замналын жимүүд тахийдаг бөгөөд
тэд цөл уруу явж, ор сураггүй алга болдог билээ.
¹⁹Темагийн жинчид тэднийг харж,
Шебагийн аянчид тэдгээрт найдаж байсан.
²⁰Найдлага тавьж байсан учраас тэд ичицгээсэн бөгөөд
тэнд очоод тэд улайцгаасан.
²¹Үнэхээр та нар одоо тийм болцгоожээ.
Та нар аймшгийг хардаг бөгөөд айн дагжиж байна.
²²Би “Надад өгөөч”,
эсвэл “Өөрсдийн эд хөрөнгөнөөс миний төлөөсийг өргөөч”,
²³эсвэл “Өстний савраас намайг чөлөөлөөч”,
эсвэл “Харгис догшин хүмүүсийн савраас намайг авраач” гэж хэлэв үү?

²⁴Надад сургаач, тэгвэл би дуугүй байя.
Хэрхэн алдсаныг минь харуулаач.
²⁵Шударга үгс юутай хүчтэй вэ?
Гэвч та нарын залруулгууд юуг залруулдаг вэ?
²⁶Цөхөрсөн нэгний үгс салхи мэт байдаг байхад
та нар үгсийг буруутгах гэж байна уу?
²⁷Та нар өнчин хүмүүсийн төлөө ч шавга хаяж,
анд найзаа арилжих байсан.
²⁸Би та нарын нүүрний өмнө худал ярьж байгаа эсэхийг надаас одоо хараач.
²⁹Эргэгтүн, би гуйж байна, бурууг бүү байлга.
Эргэгтүн, миний шударга байдал үүнд байна.
³⁰Хэлэн дээр минь буруу юм байна уу?
Миний тагнай сүйрлийг ялгаж чадахаа больсон уу?