18 ¹Дараа нь шух хүн Билдад хариулж
²-Чи хир удаан үгсийн араас хөөцөлдөх юм бэ?

Ухаарснаа үзүүл, дараа нь бид ярилцаж чадна.
³Яагаад бид чиний нүдэнд араатан амьтад шиг,
тэнэг хүн шиг тооцогдсон юм бэ?
⁴Уурандаа өөрийгөө тастдаг чи минь,
чиний төлөө газар дэлхий хоосорч,
хад чулуу байрнаасаа хөдлөх болж байна уу?

⁵Үнэндээ хорон муу хүний гэрэл унтарч,
түүний галын дөл ямар ч гэрэл өгдөггүй.
⁶Түүний майхан дахь гэрэл харанхуйлж,
түүний дэнлүү түүний дээр унтардаг.
⁷Түүний хүч тэнхээтэй алхаа саарч,
өөрийнх нь хорон санаа түүнийг доош оруулдаг.
⁸Учир нь тэрээр өөрийн хөлөөр дамжуулан торонд унагаагдсан бөгөөд
тэрээр аалзны шүлсэн дээр алхдаг аж.
⁹Занганд өсгийгөөрөө орж,
хавханд тэрээр урхидуулдаг юм.
¹⁰Түүнийг оосорлох гогцоо газарт далдлагдсан бөгөөд
түүний урхи замд нь отох бөлгөө.
¹¹Бүх эргэн тойронд аймшгууд түүнийг айлгаж,
алхам тутамд нь түүнийг яаруулна.
¹²Түүний хүч чадал барагдаж,
гамшиг зовлон хажууд нь бэлэн байх аж.
¹³Арьс нь өвчинд идэгдсэн бөгөөд
үхлийн ууган хүү үе мөчүүдийг нь иддэг аж.
¹⁴Тэрээр өөрийн майхны аюулгүй байдлаас таслагдан
аймшгуудын хааны өмнө аваачигддаг.
¹⁵Майханд нь түүний гэх юм нэг ч байхгүй.
Түүний нутагт хүхэр тараагддаг билээ.
¹⁶Доороос нь түүний үндэс хатаж,
Дээрээс нь түүний мөчир огтлогддог.
¹⁷Газар дэлхийгээс түүний дурсамж үгүй болж,
түүний нэр хаана ч байхгүй болно.
¹⁸Тэрээр гэрлээс харанхуй уруу хөөгдөж,
оршин суугчидтай ертөнцөөс зайлуулагдсан ажээ.
¹⁹Тэрээр өөрийн хүмүүсийн дунд үр хүүхэд, эсвэл төрөл садангүй бөгөөд
түр амьдарсан газартаа ч үлдэх хүнгүй билээ.
²⁰Түүний дараа байгсад түүний хувь заяанд гайхаж,
өмнөх үеийнхэн нь аймшигт нөмрүүлсэн бөлгөө.
²¹Үнэхээр, хорон муу хүний амьдрах газрууд ийм бөгөөд
Бурханыг мэддэггүй хүний газар энэ буюу гэв.