41 ¹Чи Левиатаныг загасны дэгээгээр гарган авч чадах уу?
Оосроор хэлийг нь доошоо дарж чадах уу?
²Чи түүний хамарт олс дөрлөж,
эсвэл эрүүг нь дэгээгээр цоолж чадах уу?
³Тэр чамд хүсэлт тавьж,
зөөлөн үгсийг чамд хэлэх үү?
⁴Тэр чамтай гэрээ байгуулах уу?
Чи түүнийг үүрд боолоо болгох уу?
⁵Чи шувуухайгаар наадах адил түүгээр тоглон наадаж,
эсвэл түүнийг шивэгчиддээ зориулан хүлэх үү?
⁶Худалдаачид түүнийг борлуулах уу?
Тэд түүнийг наймаачдын хооронд хуваах уу?
⁷Чи арьсыг нь жалангаар,
толгойг нь загасчны жадаар цоолж чадах уу?
⁸Гараа түүн дээр тавигтун.
Тулалдааныг сана.
Чи дахин ингэхгүй!
⁹Үзэгтүн, чиний горьдлого хуурамч юм.
Чи түүний нүдэнд ч хүртэл дорд үзэгдэх үү?
¹⁰Түүнийг өдөөхийг зүрхлэх эр зоригтон үгүй билээ.
Тэгвэл Миний эсрэг зогсож чадах тэр нэгэн нь хэн юм бэ?
¹¹Би буцааж төлөхийн тулд хэн Надад өгсөн юм бэ?
Бүхий л тэнгэрийн доорх нь Минийх юм.

¹²Тэр амьтны эрхтнүүд,
эсвэл хүч чадал,
эсвэл сайхан хэлбэр галбирынх нь тухай Би дуугүй байхгүй.
¹³Түүний гадуурх хуягийг хэн хуулж чадах вэ?
Давхар шүднийх нь дотор хэн нэвтэрч чадах вэ?
¹⁴Нүүрнийх нь эрүүг хэн онгойлгож чадах вэ?
Шүднүүдийн тойрог нь айдас байдаг аж.
¹⁵Бат бөх хуяг бол бардамнал бөгөөд
тэд завсар зайгүй битүүмжээр холбогдсон байдаг.
¹⁶Нэг нь нөгөөтэйгөө маш ойрхон тул
тэдний хооронд агаар ч орох боломжгүй бөлгөө.
¹⁷Тэд өөр хоорондоо холбоостой билээ.
Тэд нэг нэгэндээ холбогдсон бөгөөд салгагддаггүй.
¹⁸Түүнийг найтаахад гэрэл цацардаг бөгөөд
нүд нь үүрийн туяа адил юм.
¹⁹Амнаас нь шатаж буй бамбарууд гарч,
галын очнууд ч үсчинэ.
²⁰Хамрынх нь нүхнээс зэгсэн дээр буцалж буй тогооноос мэт утаа гарч ирдэг билээ.
²¹Амьсгал нь нүүрс асаадаг бөгөөд
амнаас нь галын дөл гардаг.
²²Хүзүү нь хүч чадлыг агуулдаг бөгөөд
түүний өмнө айдас цовхчино.
²³Махан биеийнх нь сул махнууд хоорондоо холбогдсон бөгөөд
түүн дээр хөдөлшгүй бат тогтжээ.
²⁴Түүний зүрх чулуу мэт хатуу,
тээрмийн бул чулуу мэт хатуу.
²⁵Тэрээр босоход, хүчтэнүүд айснаас болж зугтана.
²⁶Түүнд хүрдэг илд, жад ч,
өдтэй сум болон хуяг ч ямар ч нэмэргүй байдаг ажээ.
²⁷Тэрээр төмрийг сүрэл мэт,
хүрлийг ялзарсан мод мэт тооцдог.
²⁸Сум ч түүнийг зугтаалгаж чаддаггүй.
Дүүгүүрийн чулуунууд түүний хувьд сүрэл болсон байдаг.
²⁹Шийдмүүд ч сүрэл мэт тооцогдсон.
Тэрээр жадны шажигнаанд инээдэг.
³⁰Түүний гэдсэн доор ваарын хурц хэлтэрхийнүүд байдаг.
Тэрээр шавран дээр хайрсны мөр үлдээдэг билээ.
³¹Тэрээр гүн усыг тогоо мэт буцалгаж,
далайг тостой тогоо мэт болгодог.
³²Тэрээр ардаасаа гялбадаг мөр үлдээдэг бөгөөд
усны гүн ч бууралтсан мэт байдаг.
³³Газар дэлхий дээрх ямар ч юм нь айдас түгшүүргүйгээр бүтээгдсэн түүнтэй адилгүй билээ.
³⁴Тэрээр өндөр бүхнийг дээрээс хардаг.
Тэрээр бардамналын бүх хөвгүүдийн хаан нь билээ гэж айлдав.