17 ¹Миний сүнс бөхсөн бөгөөд өдрүүд минь гүйцэж, надад булш байна.
²Үнэхээр тохуурхагчид миний дэргэд байгаа бөгөөд
миний нүд тэдний доромжлолыг ширтэнэ.

³Одоо, Өөрийнхөө өмнө миний төлөө барьцааг тавиач.
Миний батлан даагч болох хэн байна вэ?
⁴Та тэдний зүрх сэтгэлийг ухаарлаас нуусан учраас Та тэднийг өргөхгүй.
⁵Олз ашгийн төлөө анд нөхдийнхөө эсрэг мэдүүлэг өгөгчийн үр хүүхдүүдийн нүд ч мөн сулрах болно.

⁶Гэвч Тэр намайг хүмүүсийн зүйр үг болгосон бөгөөд
хүмүүст хараал болсон нэгэн бол би юм.
⁷Уй гашуугаас болж нүд минь ч улам сүүмийж,
бүх эд эрхтнүүд минь сүг сүүдэр шиг болов.
⁸Шударга хүмүүс үүнийг хараад гайхаж,
гэмгүй нэгэн өөрийгөө бурхангүй хүмүүсийн эсрэг болгоно.
⁹Гэсэн ч зөв шударга нэгэн өөрийн замаа хөөн явж,
цэвэр гартай нэгэн улам хүчирхэг болон өсөх ажээ.
¹⁰Харин та бүгд одоо дахин ирээрэй.
Учир нь та нарын дундаас мэргэн хүнийг би олохгүй байна.
¹¹Миний хоногууд өнгөрөн одож,
миний төлөвлөгөөнүүд буюу зүрхний минь хүслүүд тасран үгүй болов.
¹²Тэд харанхуй орчинд “Гэрэл ойрхон байна” хэмээн шөнийг өдөр болгодог аж.
¹³Хэрэв би Үхэгсдийн орныг гэр шигээ харвал,
би өөрийнхөө орыг харанхуйд засдаг болно.
¹⁴Хэрэв би нүхэнд хандан “Чи миний эцэг” гэж,
өт хорхойд хандан “Миний эх болон миний эгч” гэж хэлдэг бол
¹⁵миний найдвар одоо хаана байна вэ?
Миний найдварыг хэн ойшоох юм бэ?
¹⁶Тэр нь надтай хамт Үхэгсдийн орон уруу буух болов уу?
Бид хамтдаа шороонд орно гэж үү? гэв.