4 ¹Дараа нь теман хүн Елифаз хариу хэлэхдээ,
²-Хэрэв хэн нэгэн хүн чамд үг хэлэхээр зориглоод үзвэл,
чи тэвчээрээ алдах уу?
Гэвч хэн ярихыг хориглож чадах билээ?
³Чи олон хүнийг сургамжилсан бөгөөд
чи сул дорой гарыг тэнхрүүлснээ харагтун.
⁴Чиний үгс ганхаж буй хүмүүст зогсоход нь тусалсан бөгөөд
чи сөхрөгсдийг хүчирхэгжүүлсэн билээ.
⁵Харин одоо тэр нь чамд ирэхэд,
чи тэвчээргүй байна.
Энэ нь чамд хүрэхэд чи зориг мохжээ.
⁶Бурханаас эмээх нь чиний итгэл, үнэнч шударга замаар явах чинь
чиний найдвар биш бил үү?

⁷Одоо санаач, гэмгүй атлаа мөхсөн хэн байна?
Эсвэл шулуун шударга нэгэн хаана сөнөсөн бэ?
⁸Миний харсны дагуу гэм бурууг хагалж,
зовлон зүдгүүрийг таригчид түүнийгээ хурааж авдаг.
⁹Бурханы амьсгалаар тэд мөхөж,
Түүний уур хилэнгийн хүчтэй цохилтоор тэд төгсдөг юм.
¹⁰Арслангийн архираан,
арслангийн дуу тасарч, залуу арслангуудын шүднүүд хугарчээ.
¹¹Идэш дутагдсанаас арслан үхэж,
эм арслангийн зулзаганууд таран бутарчээ.

¹²Надад нэгэн үг нууцаар ирж,
чих минь түүний шивнэхийг сонсов.
¹³Хүмүүс гүн нойронд автах шөнийн үзэгдлүүдээс гардаг сэтгэл түгшээсэн бодлуудын дунд
¹⁴айдас ба чичиргээ над уруу ирж,
бүх ясыг минь чичрүүлэв.
¹⁵Тэгээд нүүрэн дээгүүр минь сүнс өнгөрсөнд,
биеийн минь үс арзайн босов.
¹⁶Тэр нь хөдөлгөөнгүй зогсож байсан боловч
би төрхийг нь ялган таньж чадахгүй байлаа.
Нүдний минь өмнө дүрс байв.
Анир чимээгүй.
Дараа нь би дуу сонслоо.
¹⁷“Хүн төрөлхтөн Бурханы өмнө зөв шударга байж чадах уу?
Хүн өөрийн Бүтээгчийн өмнө цэвэр байж чадах уу?
¹⁸Тэрээр Өөрийн зарц нартаа ч итгэдэггүй.
Өөрийн тэнгэр элч нарын эсрэг ч Тэрээр алдаа эндлийг нь тулгадаг.
¹⁹Тэгвэл шавар сууцанд амьдардаг,
үндэс суурь нь шороонд байдаг,
дэнгийн эрвээхийнээс өмнө бяцлагддаг хүмүүст яаж найдах юм!
²⁰Өглөөнөөс үдшийн хооронд л тэд хэсэг болж хугардаг юм.
Ажиглагдахгүйгээр тэд мөнхөд мөхдөг ажээ.
²¹Тэдний дотор майхнуудынх нь оосрууд татагдсан биш үү?
Мэргэн ухаангүйгээр тэд үхдэг юм”.