24 ¹Яагаад Төгс Хүчит Нэгэн цаг хугацааг хураагаагүй вэ?
Яагаад Түүнийг таньж мэддэг хүмүүс
Түүний өдрүүдийг хардаггүй вэ?
²Зарим нь шав тэмдгүүдийг хөдөлгөж,
тэд мал сүргийг булаан авч, залгидаг.
³Тэд өнчин хүүхдүүдийн илжигнүүдийг булаан авдаг.
Тэд бэлэвсэн эмийн үхрийг барьцаанд авдаг.
⁴Тэд доройг замаас гадагш түлхдэг.
Нутгийн ядуус бүгдээрээ нэг дор нуугдах болсон.
⁵Үзэгтүн, цөл дэх хулангуудын адил
тэд хоол хүнс буюу цөлд үр хүүхдүүддээ талх хайхаар ажилд гардаг.
⁶Тэд талбайгаас хог хаягдлаа түүж,
хорон муу хүний усан үзмийн цэцэрлэгүүдээс үлдэгдэл цуглуулдаг.
⁷Тэд өмсөх хувцасгүйгээр шөнийг нүцгэн өнгөрүүлж,
хүйтэнд нөмрөх юмгүй өнждөг.
⁸Тэд уулын бороонд нордог бөгөөд
нөмөр бараадан хад чулуу тэвэрдэг.
⁹Бусад нь өнчин хүүхдүүдийг хөхнөөс нь салгаж,
ядуусаас барьцаа авдаг бөлгөө.
¹⁰Тэд ядуусыг хувцасгүй, нүцгэн явуулж,
өлсөгчдөөс юүжилсэн тариагаа булаадаг.
¹¹Ханан дунд тэд тос үйлдвэрлэдэг.
Тэд дарсны шахуургуудыг гишгэдэг боловч, ундаасдаг.
¹²Хотоос хүмүүс ёолж,
шархадсан хүмүүсийн сэтгэл хашхирч байна.
Гэсэн ч Бурхан тэнэгүүдэд анхаарал тавьдаггүй.

¹³Бусад нь гэрлийн эсрэг тэрслэгчидтэй хамт байсан билээ.
Тэд гэрлийн замыг мэдэхийг ч,
түүний жимээр явахыг ч хүсдэггүй.
¹⁴Алуурчин үүрээр босдог.
Тэрээр ядуусыг хийгээд үгээгүйчүүдийг алдаг бөгөөд
шөнө нь хулгайч шиг байдаг.
¹⁵Завхайрагчийн нүд үдшийн бүрийг хүлээн,
“Намайг нэг ч нүд харахгүй” хэмээн нүүрээ тагладаг.
¹⁶Харанхуйд тэд байшингуудыг ухаж,
өдөр тэд өөрсдийгөө халхалж хаадаг.
Тэд гэрлийг мэддэггүй юм.
¹⁷Түүний хувьд өглөө түнэр харанхуйтай адил байдаг.
Учир нь тэрээр түнэр харанхуйн аймшгуудтай танил билээ.

¹⁸Тэд усны мандал дээр хөнгөн.
Тэдний хувь газар дээр хараагдсан байдаг.
Тэд усан үзмийн талбайнууд уруу зүглэдэггүй.
¹⁹Ган болон халуун нь цас усыг хайлуулан ширгээх мэт
нүгэл үйлдэгсдийг Үхэгсдийн орон залгидаг.
²⁰Эх нь тэднийг мартах болно.
Тэрээр дахин дурсагдахгүй болтол
өт хорхой түүгээр амтархан хооллодог.
Хорон муу байдал мод мэт устана.
²¹Тэрээр хүүсэр эмэгтэйг буруушааж,
бэлэвсэн эмд сайныг үйлддэггүй билээ.
²²Харин Тэрээр хүчтэнийг Өөрийн хүчээр чирдэг.
Тэр босдог боловч хэнд ч амь насны баталгаа байдаггүй.
²³Тэр тэднийг аюулгүй байдлаар хангадаг бөгөөд
тэд дэмжлэг авсан байдаг.
Түүний мэлмий тэдний замууд дээр байдаг.
²⁴Тэд багахан хугацаанд өргөмжлөгдөөд,
дараа нь алга болдог.
Үүнээс гадна, тэд доош буулгагддаг бөгөөд
бусдын хамт авагдаж өөрсдийн хадаж байсан тариан түрүү мэт хатдаг.
²⁵Хэрэв энэ бүхэн тийм бус байх аваас
хэн намайг худалч гэж нотлон,
хэн миний үгсийг хоосон болгох вэ? гэв.