29 ¹Иов дахин өөрийн үгсээ үргэлжлүүлэн
²-Би өнгөрөн одсон саруудынх шигээ буюу
Бурхан намайг хамгаалж байсан өдрүүдийнх шигээ байсан ч болоосой.
³Түүний дэнлүү толгой дээр минь гэрэлтэж,
Түүний гэрлээр би харанхуй дундуур явдаг байсан билээ.
⁴Бурханы нөхөрлөл миний майхан дээр байх үе буюу
би амьдралынхаа ургац хураалтын үед байжээ.
⁵Төгс Хүчит Нэгэн надтай хамт байсаар,
хүүхдүүд минь намайг хүрээлэн байв.
⁶Алхмууд минь цөцгийн тосонд булхагдаж,
хад чулуу надад зориулан тос цутгадаг байв.
⁷Би хотын дааман хаалга уруу гарч,
талбай дээр суудлаа эзэлдэг байсан бөгөөд
⁸залуус намайг хараад нуугдаж,
өвгөд босож, зогсдог байв.
⁹Ноёд үгсээ хорьж,
гараараа амаа тагладаг байв.
¹⁰Язгууртнуудын дуу алга болж,
хэл нь тагнайнд нь наалддаг байв.
¹¹Учир нь чихнүүд сонсоод намайг ерөөгдсөн гэж дуудаж,
нүднүүд хараад намайг гэрчилдэг байв.
¹²Яагаад гэвэл би тусламж гуйн хашхирсан ядуусыг хийгээд
туслагчгүй өнчин хүмүүсийг авардаг байв.
¹³Үхэж буй хүмүүсийн ерөөл надад ирж,
би бэлэвсэн эмэгтэйчүүдийн зүрхийг баярлуулан дуулуулдаг байсан.
¹⁴Би шударга зөвийг өмсөж,
тэр намайг хувцаслав.
Миний зөвт байдал нөмрөг болон малгай мэт байв.
¹⁵Би сохорт нүд нь,
доголонд хөл нь болж байв.
¹⁶Би үгээгүйчүүдэд эцэг нь байсан бөгөөд
мэддэггүй хэргийн учрыг ч шинжин тайлж байв.
¹⁷Би хорон муу хүний эрүүг хугалж,
амнаас нь олзыг нь булааж авдаг байв.
¹⁸Тэгээд би “Үүрэндээ би үхнэ.
Өдрүүдийг би элс адил олшруулна.
¹⁹Үндэс минь ус уруу тархаж,
мөчрүүд дээр минь шөнөжин шүүдрийн ус бөнжигнөнө.
²⁰Алдар минь надтай хамт,
миний нум гарт минь шинэчлэгддэг” гэж бодов.

²¹Намайг тэд сонсоцгоож, хүлээцгээж,
зөвлөгөөг минь хүлээн чимээгүй байдаг байв.
²²Миний үгсийн дараа тэд дахин ярьдаггүй байсан бөгөөд
миний яриа тэдэнд тааламжтай байсан.
²³Тэд намайг хур бороо мэт хүлээж,
хаврын бороо мэт амаа ангайлгадаг байв.
²⁴Тэд итгээгүй байхад би тэдэн уруу инээмсэглэж,
миний нүүрний гэрлийг тэд унтрааж байгаагүй юм.
²⁵Би тэдэнд замыг сонгож,
тэргүүнд нь сууж, дайчдынхаа дунд буй хаан мэт буюу
гашуудагсдыг тайтгаруулсан нэгэн мэт заларч байсан.