19 ¹Тэгэхэд Иов хариулан
²-Хэдий болтол та нар намайг тарчлааж,
үгсээр намайг бяцлах юм бэ?
³Та нар намайг ийнхүү арван удаа доромжиллоо.
Намайг буруутгахаасаа ч та нар ичдэггүй билээ.
⁴Хэрэв би үнэхээр алдсан байсан ч алдаа минь наддаа л үлдэнэ.
⁵Хэрэв та нар үнэхээр миний эсрэг өөрсдийгөө дөвийлгөж,
миний шившгийг надад нотолж байгаа бол,
⁶Бурхан намайг буруутгаж,
миний эргэн тойронд Өөрийн торыг татсаныг мэдтүгэй.

⁷Харагтун, би “Хүчирхийлэл!” хэмээн орилдог боловч ямар ч хариу авдаггүй.
Би тусламж эрэн хашхирдаг, харин ямар ч шударга ёс алга.
⁸Тэрээр замыг минь тагласан нь би нэвтрэн гарч чадахгүйн тулд бөгөөд
тэрээр жимүүд дээр минь харанхуйг буулгажээ.
⁹Тэрээр алдар хүндийг минь надаас зайлуулж,
тэргүүнээс минь титмийг тайлж авсан юм.
¹⁰Тэрээр намайг тал бүрд сүйтгэдэг бөгөөд би өнгөрлөө.
Тэрээр найдварыг минь мод мэт үндсээр сугалан хаяв.
¹¹Тэрээр бас Өөрийн уураа миний эсрэг ноцоож,
намайг Өөрийн дайснаа хэмээн үзсэн билээ.
¹²Түүний цэргүүд хамтдаа ирж, миний эсрэг чиглэж,
майхныг минь бүслэн буудалладаг.

¹³Тэрээр ах дүүсийг минь надаас хол явуулсан бөгөөд
танилууд минь надаас бүрмөсөн дөлөх болжээ.
¹⁴Төрөл төрөгсөд минь дайжсан бөгөөд
дотнын нөхөд минь намайг мартав.
¹⁵Миний гэрт амьдрагсад хийгээд шивэгчид минь хүртэл намайг танихгүй хүнд тооцдог.
Тэдний нүдэнд би харь хүн билээ.
¹⁶Зарцаа би дууддаг боловч, тэрээр хариулдаггүй.
Би түүнийг амаараа гуйх болдог.
¹⁷Миний амьсгал эхнэрт минь цээрлэгдэж,
өөрийн ах дүүстээ би жигшигдэж байна.
¹⁸Жаахан хүүхдүүд хүртэл намайг жигшдэг.
Намайг босоход тэд миний эсрэг ярьдаг юм.
¹⁹Бүх зөвлөхүүд минь намайг үзэн яддаг бөгөөд
миний хайрлаж байдаг хүмүүс ч миний эсрэг эргэжээ.
²⁰Миний яс нь арьс, махтайгаа наалдаж,
би шүднийхээ буйлтай л үлдлээ.
²¹Бурханы мутар намайг цохисон тул миний анд нөхөд та нар
намайг өрөвдөөч, намайг өрөвдөөч.
²²Юунд та нар Бурханы адил намайг хавчиж,
миний маханд цадахгүй байна вэ?

²³Миний үгс бичигдсэн байдаг ч болоосой!
Тэд номд буулгагддаг ч болоосой!
²⁴Төмөр зоруул болон тугалгаар тэд хад чулуун дээр үүрд мөнхөд сийлэгддэг ч болоосой!
²⁵Миний хувьд гэвэл, миний Золигч амьд гэдгийг болон
эцэст Тэрээр дэлхий дээр байр сууриа эзэлнэ гэдгийг би мэднэ.
²⁶Арьс минь устгагдсан хойно ч
би махан биеэрээ Бурханыг харах болой.
²⁷Түүнийг би өөрөө харах бөгөөд Түүнийг,
өөр хэнийг ч биш миний нүд үзэх болно.
Миний зүрхэн дотор үүнийг л хүсэн хүлээж байна!
²⁸Хэрэв та нар “Бид түүнийг яаж хавчих вэ?”,
мөн “Түүний эсрэг хэргийн ямар шалтгийг бид олж чадах вэ?” гэж хэлбэл,
²⁹өөрсдөд чинь ирэх илднээс айцгаа.
Учир нь уур хилэн нь илдний шийтгэл бөгөөд
энэ нь шүүлт бий гэдгийг та нарт мэдүүлэхийн тулд юм гэв.