38 ¹Тэгтэл шуурган дундаас ЭЗЭН Иовд хариулан,
²-Мэдлэггүй үгсээр зөвлөгөөг гуйвуулагч тэр нь хэн юм бэ?
³Одоо хүн шиг ууц нуруугаа бүсэл.
Учир нь Би чамаас асуух бөгөөд
чи Надад заавар өг.
⁴Би газар дэлхийн суурийг тавихад чи хаана байв аа?
Хэрэв чамд ойлголт байгаа юм бол Надад хэлээч,
⁵түүний хэмжүүрүүдийг хэн тогтоодог вэ?
Чи мэддэгээс хойш. Надад хэл. Түүний дээр хэн зураас татсан бэ?
⁶Юун дээр түүний сууриуд тогтсон бэ?
Түүний булангийн чулууг хэн тавьсан юм бэ?
⁷Тэгэхэд өглөөний одод хамтдаа дуулцгааж,
Бурханы бүх хөвгүүд баярлалдан уухайлсан.

⁸Эсвэл хэвлийгээс оргилон гарахад нь
хэн далайг хаалгаар хязгаарласан бэ?
⁹Тэгэхэд Би үүлийг түүний хувцас,
түнэр харанхуйг түүний өлгий болгож,
¹⁰мөн түүнд хил тогтоож,
хаалга түгжээг тавьж,
¹¹“Энэ хүртэл чи ирэгтүн,
харин цаашилж болохгүй.
Энд чиний бардам давалгаанууд зогсох болно” гэж Би айлдсан билээ.

¹²Чи амьдралдаа өглөөд тушааж,
үүрийн гэгээнд байрыг нь мэдүүлж байв уу?
¹³Ингэснээр тэр нь газар дэлхийн хязгаараас зууран авч,
хорон муу хүмүүс эндээс сэгсрэгдэх болно.
¹⁴Энэ нь лацны шавар шиг өөрчлөгдсөн.
Тэд хувцас мэт болцгоодог.
¹⁵Хорон муугаас тэдний гэрэл авагдсан бөгөөд
өргөгдсөн гар хугарав.

¹⁶Чи далайн ундарга уруу нэвтэрч,
гүний хөндийнүүдэд алхсан уу?
¹⁷Үхлийн дааман хаалгууд чамд илэрхийлэгдэж,
эсвэл чи гүн харанхуйн дааман хаалгуудыг харсан уу?
¹⁸Газар дэлхийн өргөнийг чи ойлгосон уу?
Хэрэв чи энэ бүгдийг мэддэг бол хэлээч.

¹⁹Гэрлийн оршихуй уруу хүрэх зам хаана байна вэ?
Мөн харанхуй, түүний газар хаана байна вэ?
²⁰Чи түүнийг орших газарт нь аваачиж чадах уу?
Түүний гэрт хүрэх замыг чи мэддэг үү?
²¹Тэгэхэд чи төрсөн учраас чи мэдэх бөгөөд
өдрүүдийн чинь тоо тоолшгүй их билээ!
²²Чи цасны агуулахуудад орж,
эсвэл мөндрийн агуулахуудыг харсан уу?
²³Би тэдгээрийг зовлонт цагийн төлөө,
дайн тулааны өдөрт зориулан нөөцөлсөн билээ.
²⁴Гэрэл ямар замаар хуваагдах хийгээд
дорнын салхи ямар замаар газар дэлхий дээр тархсан бэ?

²⁵Үерийн сувгийг,
эсвэл аянгын мөрийг хэн татсан бэ?
²⁶Энэ нь хүмүүсгүй газарт,
нэг ч хүнгүй цөл дээр бороо авчрахын тулд бөгөөд
²⁷эзгүй хоосон газрыг хангаж,
өвсний үрнүүдийг соёолуулахын тулд болой.
²⁸Бороонд эцэг бий юү?
Эсвэл хэн шүүдрийн дуслуудыг олсон бэ?
²⁹Хэний хэвлийнээс мөс гарсан бэ?
Тэнгэрийн хярууг хэн төрүүлсэн бэ?
³⁰Ус чулуу шиг хатуу болж,
гүний гадаргуу ч хоригдсон байдаг.

³¹Чи Мичид зургааг холбож,
Марал гурвыг салгаж чадах уу?
³²Чи оддын ордуудыг улиралд нь удирдаж,
Долоон бурханг түүний дагуулаар залж чадах уу?
³³Чи тэнгэрийн тогтоолуудыг мэдэж,
тэдгээрийн газар дэлхий дээрх хуулиудыг тохируулж чадах уу?

³⁴Асар их усаар бүрхүүлэхийн тулд
үүлс уруу хандан чи дуугаа өндөрсгөж чадах уу?
³⁵“Бид энд байна” хэмээн чамд илтгээд явахаар
чи аянга гялбааг урагш илгээж чадах уу?
³⁶Дотоод зүрхэнд хэн мэргэн ухааныг оруулж,
оюун ухаанд хэн ойлголтыг өгсөн бэ?
³⁷Хэн мэргэн ухаанаар үүлсийг тоолж чадах вэ?
Эсвэл тэнгэрийн усны савнуудыг
³⁸тоос нягтран цул болж,
шавар хоорондоо зууралдахад тогтоож чадах вэ?

³⁹Чи арслангийн төлөө ан агнаж,
эсвэл залуу арслангуудын хоол идэх дурыг хангаж чадах уу?
⁴⁰Тэд нүхнүүдэд хоргодон,
үүрэнд хэвтэн хүлээдэг.
⁴¹Хэрээний дэгдээхийнүүд Бурханд хашхиран хоолгүй тэнүүчилж байхад
хэн хэрээнд хоолыг нь залгуулж өгдөг вэ?